Ўзбекистонда асосий озиқ-овқат маҳсулотлари импорти ва реализацияси учун қўшимча қиймат солиғидан (ҚҚС) берилган имтиёзлар муддати узайтирилади. Бу ҳақда Олий Мажлис Қонунчилик палатаси депутати Дониёр Ғаниев маълум қилди.
Эслатиб ўтамиз, 2021 йилда парламент томонидан 2021 йил 1 майдан 31 декабргача бўлган муддатда кунгабоқар ва соя уруғлари ҳамда ўсимлик ёғи импорти, шунингдек ўсимлик ёғини ишлаб чиқариш ва ички бозорда реализация қилиш ҚҚСдан озод этилганди.
Бундан ташқари, икки ой аввал Солиқ кодексига киритилган ўзгартиришларга асосан 2021 йил 10 октябрдан 2021 йил охиригача гўшт (мол, қўй, товуқ), тирик ҳайвонлар (қорамол ва парранда) ва уларни сўйишдан олинган маҳсулотларни, картошка ҳамда музлатилган балиқни реализация қилиш бўйича айланма, шунингдек, уларни Ўзбекистон ҳудудига олиб кириш ҳам ҚҚСдан озод қилинганди.
Депутатнинг ёзишича, яқинда бўлиб ўтган Бюджет лойиҳаси муҳокамаси доирасида у 2022 йилда инфлация даражасини 2021 йилга нисбатан пасайтириш, аҳолини харид қобилиятини ошириш ва энг асосийси истеъмол таркибидаги асосий озиқ-овқат маҳсулотлари нархларини барқарор сақлаш мақсадида ҳукумат вакиллари, жумладан, бош вазир ўринбосари Жамшид Қўчқоровдан озиқ-овқат маҳсулотлари учун 2021 йил охиригача берилган ҚҚС имтиёзлари муддатини узайтириш масаласини кўриб чиқишни сўраган.
Таъкидланишича, 23 декабрь куни парламентга ҳукумат томонидан киритилган қонун лойиҳасида айнан шу таклиф инобатга олиниб, 2021 йил охиригича берилган имтиёзлар муддати яна 4 ой муддатга чўзилиши назарда тутилмода.
Демак, ушбу қонун лойиҳасига асосан 2022 йил 30 апрелга қадар қуйидагилар ҚҚСдан озод қилинади:
- Ўзбекистон ҳудудига ўсимлик ёғи, кунгабоқар ва зиғир уруғи, шунингдек, соя данагини олиб кириш;
- ўсимлик ёғини (пахта ёғидан ташқари) ишлаб чиқариш ва (ёки) реализация қилиш бўйича айланма;
- гўшт (мол, қўй, товуқ), тирик ҳайвонлар (қорамол ва парранда) ва уларни сўйишдан олинган маҳсулотларни, картошкани ҳамда музлатилган балиқни реализация қилиш бўйича айланма, шунингдек уларни мамлакат ҳудудига олиб кириш.
Қолаверса, гўшт, ёғ ва картошка маҳсулотлари аҳоли истеъмол саватчаси таркибида юқори вазнга эга эканлиги инобатга олинса, ушбу маҳсулотлар нархларини барқарор сақланиши ўз навбатида бошқа истеъмол товар ва хизматлар нархлари ўсиш суръатларини пасайтиришга ижобий таъсир қилади. Умид қиламанки, мазкур қонун лойиҳаси келгуси парламент ялпи йиғилишида депутатлар томонидан кўриб чиқилиб, маъқулланади ҳамда Сенатга юборилади», — деб ёзади Дониёр Ғаниев.
Изоҳ (0)