Сўнгги кунларда Фарғона вилояти ҳудудида бир неча маротаба ер силкиниши кузатилди. 21 декабрь куни вилоятнинг Риштон туманида, 23 декабрь куни эса шу туманда 2 марта зилзила кузатилди. ФВВ Сейсмопрогностик мониторинг Республика маркази мазкур ҳолат юзасидан «Darakchi.uz» изоҳ берди.
Қайд этилишича, Ўзбекистон ҳудудининг 70 фоиз қисми сейсмик фаол ҳудуд ҳисобланади. «Жумладан Фарғона водийси, Тошкент шаҳри ва Тошкент вилоятлари Республиканинг бошқа ҳудудларига нисбатан анчайин сейсмик фаол ҳудудлардир», — дейилади марказ изоҳида.
Таъкидланишича, йил давомида Республика ҳудуди бўйича ўртача ҳисобда 1200 дан ошиқ кучсиз ва сезиларли зилзилалар қайд этилади. Ушбу зилзилаларнинг аксар қисми кучсиз зилзилалар бўлиб, фақатгина махсус асбоб-ускуналар ёрдамида аниқланади.
«Биргина Фарғона водийси ҳудудида ҳафта давомида ўртача 20-25 та кучсиз ва сезиларли зилзилалар қайд этилади. Бу табиий жараён ҳисобланади. Бундан ташқари Республика билан чегарадош Қирғизистон, Тожикистон ва Афғонистон ҳудудлари анчайин сейсмик фаол ҳудудлар тоифасига кирганлиги сабабли, мазкур давлатларда содир бўлган сезиларли зилзилалар бизнинг қўшни ҳудудларимизда ҳам сезилади. Умуман олганда Марказий Осиё минтақасининг кўп қисми сейсмик фаол ҳудуд ҳисобланади», — дейилади хабарда.
Алоҳида қайд этилишича, шу кунларда Фарғона вилояти Риштон туманида кетма-кет содир бўлаётган зилзилалар кучсиз зилзилалар ҳисобланиб, одамлар уни деярли сезмайди.
Маълумот учун, 24 декабрь куни Ўзбекистон—Қирғизистон чегарасида ҳам зилзила қайд этилди. Зилзила эпицентри Тошкентдан 191 километр жанубий-шарқда жойлашган бўлиб, ўчоғи 15 километр чуқурликда, магнитудаси 3 баллга тенг бўлган.
Изоҳ (0)