Swissinfo ахборот агентлиги Гулнора Каримованинг адвокати Грегори Манжага таяниб хабар беришича, Швейцариянинг федерал жиноят суди компанияга тегишли 293 миллион доллардан кўпроқ маблағни мусодара қилиш тўғрисида қарор қабул қилган.
Таъкидланишича, суд ишида қатнашган бир неча киши, шу жумладан, Гулнора Каримова ва унинг ёрдамчиси «пул ювишда» айбдор деб топилгани учун ушбу маблағларнинг катта қисмини мусодара қилиш керак деган қарорга келган.
Бироқ тахминан 70 миллион доллар миқдоридаги маблағ Takilant компаниясига қайтариб берилади. Бунинг сабаби, тергов жараёнида бир нечта компаниялар билан боғлиқ бўлган ушбу активлар жиноят натижасида олингани аниқланмаган. Бу ҳақда 2021 йилнинг 22 декабрь куни Федерал жиноят суди эълон қилган баёнотда қайд этилган.
Суд қарори Швейцария Федерал прокуратураси томонидан 2012 йилда Гулнора Каримованинг шахсий ёрдамчиси ва Россия телекоммуникация компаниясининг ўзбек филиали менежерига қарши «пул ювиш» айбловлари билан боғлиқ кенг қамровли тергов доирасида яна бир бобни ёпган.
Эслатиб ўтамиз, 2018 йилда Takilant Ltd. компаниясига тегишли 350 миллион доллар музлатилган эди. 2020 йилга келиб, Швейцариянинг федерал апелляция суди Гулнора Каримованинг компанияси қонуний бенефициари экани тўғрисидаги даъвосини кўриб чиқиши маълум қилинди. Ўшандан бошлаб Каримованинг вакиллари ушбу музлатилган активларни қайтариб олишга ҳаракат қилаётганди. «Бу Гулнора Каримова учун муҳим ғалаба», — деганди унинг адвокати Грегори Манжа.
2019 йил 18 мартда Тошкент шаҳар суди ҳукми билан Гулнора Каримовага 13 йил 4 ой муддатга озодликдан маҳрум қилиш жазоси тайинланди. Жазо муддатини 2015 йил 21 августдан бошлаб ҳисоблаш белгиланган эди.
2019 йил март ойида АҚШ Гулнора Каримова ва «Ўздунробита»нинг собиқ бош директори Беҳзод Аҳмедовни коррупция ва 865 миллион доллардан кўпроқ пулни «ювган»ликда айблаганди. 24 июнда эса Швейцария Бош прокуратураси Каримова иши бўйича музлатилган 130 миллион швейсар кронаси (133,7 миллион доллар) миқдоридаги маблағни Ўзбекистонга қайтаришини маълум қилганди.
2020 йилнинг май ойига келиб, Каримованинг 10 миллион долларлик активи Франциядан қайтарилган. Сентябрга келиб, Швейцария ҳукумати мусодара қилинган пул маблағларини Ўзбекистонга қайтариш шартлари бўйича мамлакат ҳукуматлари келишувга эришганини маълум қилди. Ўшанда Каримованинг Швейцариядаги ҳисобларидан олинган 131 миллион долларлик маблағ Ўзбекистонга қайтарилиши айтилганди.
Изоҳ (0)