23 декабрь куни Ўзбекистон президенти Шавкат Мирзиёев 20 август Тадбиркорлар куни этиб белгилаш тўғрисидаги қонунни имзолади. Ҳужжат Олий Мажлис Қонунчилик палатаси томонидан 19 ноябрда ва Сенат томонидан 15 декабрда маъқулланган.
Эслатиб ўтамиз, 2021 йилнинг 20 август куни Тошкент шаҳридаги Ўзбекистон халқаро анжуманлар саройида президент Шавкат Мирзиёевнинг тадбиркорлар билан очиқ мулоқоти бўлиб ўтганди. Бундай шаклдаги учрашув илк бор ўтказилган ва унда жами ўн мингга яқин тадбиркор иштирок этган эди.
Очиқ мулоқот олдидан тадбиркорларни қийнаётган муаммолар сўралган. Турли масалаларга оид 15 мингдан ортиқ мурожаатлар бўлгани қайд этилган. Президент ўз нутқида уларни ҳал қилишга қаратилган 7 та муҳим йўналишни кўрсатиб ўтганди. Биринчи йўналиш – бизнесни молиялаштириш, иккинчиси – солиқ тизимини такомиллаштириш ва бизнесга солиқ юкини камайтириш, учинчиси – ер ажратиш, тўртинчиси – инфратузилма, бешинчиси – экспортёр корхоналарни қўллаб-қувватлаш, олтинчиси – транспорт-логистика, еттинчиси – соҳадаги тартиб-таомилларни соддалаштириш масалаларига қаратилган.
Мазкур учрашувда Шавкат Мирзиёев 20 августни Ўзбекистонда «Тадбиркорлар куни» деб эълон қилишни таклиф этганди. «Бугунги тажрибамиздан келиб чиқиб, ушбу учрашувларни ҳар йили ташкил этсак, буни яхши бир анъанага айлантирсак, Сизларга маъқулми? Шу муносабат билан, бугунги санани, яъни 20 августни мамлакатимизда ‘Тадбиркорлар куни’ деб эълон қилиб, уни ҳар йили юртимизда кенг нишонласак, бу ташаббусга нима дейсизлар», – дея таклиф билдирганди Президент.
Изоҳ (0)