Тожикистон Адлия вазирлиги биринчи марта давлат бюджетидан куч тузилмалари ва судлар учун сарфланадиган харажатлар миқдорини эълон қилди. Бу ҳақда «Фергана» агентлиги хабар берди.
«2022 йил учун Тожикистон Республикаси давлат бюджети тўғрисида»ги қонуннинг 2-моддаси иккинчи пунктида кўрсатилишича, «мудофаа, ҳуқуқни муҳофаза қилиш органлари, ҳуқуқ-тартибот органлари ва судлар»ни молиялаштиришга сарфланадиган умумий харажатлар қарийб 2,3 миллиард сомонийни (203,5 миллион доллар) ташкил этади, бу бюджет харажатларининг 6,8 фоиздан ортиғига тенг.
Қонун матнида харажатларнинг муассасалар ва ҳуқуқни муҳофаза қилиш органлари турларига кўра тақсимоти келтирилмаган. Бироқ ўтган йилларда куч тузилмалари ва ҳуқуқ-тартибот органлари учун кетадиган харажатларнинг умумий суммаси ҳам эълон қилинмасди — ўтган йиллардаги давлат бюджети тўғрисидаги қонунларда тегишли банд «нашр қилиш учун эмас» деган чизиқча билан белгиланган.
«Давлат сирлари тўғрисида»ги қонунда республиканинг мудофаа ва хавфсизлик бўйича давлат бюджети харажатларининг умумий кўрсаткичларини эълон қилиш тақиқланмаган, деб ёзади Asia-Plus. Қуролли кучларнинг айрим турларига кетадиган харажатлар учун «Махфийлик грифи» қонун билан белгиланади.
Шу билан бирга, Тожикистон мудофаа харажатлари миқдори ҳар йили ҳарбий кучларнинг глобал рейтингини (Military Strength Ranking) кўрсатувчи Global Firepower портали томонидан эълон қилинади. Рейтингга кўра, 2021 йилда Тожикистон мудофаа учун 79 миллион доллар ажратишни режалаштирган эди.
Тожикистоннинг 2022 йилги давлат бюджети тўғрисидаги қонун 24 ноябрь куни депутатлар томонидан қабул қилинган, 30 ноябрь куни мамлакат президенти Эмомали Раҳмон томонидан имзоланган. Ҳужжатга кўра, келаси йил бюджетнинг даромад қисми 33 миллиард сомоний (2,92 миллиард доллар), харажатлар қисми 33,62 миллиард сомоний (2,97 миллиард доллар) миқдорида бўлиши режалаштирилган. Бюджет тақчиллиги 620 миллион сомонийдан (54 миллион доллардан) ортиқни ташкил этади, бу эса хусусийлаштириш, векселларни сотиш, халқаро ташкилотлар кредитлари ва бошқа манбалар ҳисобидан қопланади.
Эслатиб ўтамиз, International Budget Partnership халқаро ташкилоти томонидан тузилган Очиқ бюджет индексида Тожикистон бюджети ноаниқ давлатлар гуруҳига киритилган. Давлат бюджети умумхалқ муҳокамасига киритилмайди, қабул қилингандан кейин давлат органлари соҳалар бўйича даромадлар ва харажатларнинг фақат умумлаштирилган рақамларини тафсилотларсиз ва тор тармоқларга эълон қилади.
Изоҳ (0)