Gaitining Kap Aitien shahrida yonilg‘i tashuvchi avtosisterna yo‘l-transport hodisasiga uchradi. So‘ng yuk mashinasida kuchli portlash yuz berdi, oqibatda 40 dan ortiq odam halok bo‘ldi, deb yozadi “Korrespondent.net”.
Qayd etilishicha, voqea 13-dekabr kuni tunda sodir bo‘lgan. Shahar hokimiyatining vakili Patrik Almonorning aytishicha, dastlab avtosisterna haydovchisi mototsikl bilan to‘qnashib ketmaslikka urinib, avariyaga uchragan.
Shundan so‘ng mahalliy aholi yonilg‘i olish ilinjida avtosisterna atrofiga yig‘ilgan vaqtda mashina portlab ketgan. Oqibatda 40 dan ortiq odam halok bo‘lgan, kamida 47 kishi jarohat olgan.
Eslatib o‘tamiz, Gaitida 14-avgust kuni 7,2 magnitudali zilzila yuz bergandi. Uning ketidan birma-bir aftershoklar, xususan, 5,2 magnitudali takroriy yerosti silkinishlari kuzatilgan. Zilzila epimarkazi poytaxt Port-o-Prensdan 125 kilometr g‘arbda joylashgan.
Avval qurbonlar soni 1297 kishiga, keyinroq 1419 kishiga, yana bir muddat o‘tib 2248 kishiga yetgani, ularning soni yana oshishi mumkinligi haqida xabar qilingandi.
Shuningdek, zilziladan keyin Gaiti qirg‘oqlariga “Greys” tropik bo‘roni urilgan. Uning oqibatida qidiruv-qutqaruv ishlari vaqtincha to‘xtatilgan.
Izoh (0)