Gaitidagi zilzila qurbonlari soni 2248 kishiga yetdi

Gaitida 14-avgust kuni yuz bergan zilzila tufayli halok bo‘lganlar soni 2248 kishiga yetdi. Bu haqda respublika fuqaro muhofazasi boshqarmasiga tayanib, EADaily xabar berdi.

Bundan avval qurbonlar soni 2 207 kishiga yetgani ma’lum qilingandi. Boshqarma ma’lumotlariga ko‘ra, 12 763 kishi jarohatlangan, 329 kishi bedarak yo‘qolgan. Tabiiy ofat oqibatida mintaqadagi 53 mingdan ziyod bino butunlay, 83 mingdan ortig‘i qisman vayron bo‘lgan.

Shuningdek, zilziladan keyin Gaiti qirg‘oqlariga “Greys” tropik bo‘roni urilgan. Uning oqibatida  qidiruv-qutqaruv ishlari vaqtincha to‘xtatilgan. Bo‘ron mamlakatning janubi-g‘arbiy qismiga — zilziladan eng ko‘p zarar ko‘rgan hududlarga ta’sir qilgan.

Gaitida 14-avgust, shanba kuni 7,2 magnitudali zilzila yuz bergandi. Uning ketidan birma-bir aftershoklar, xususan, 5,2 magnitudali takroriy yerosti silkinishlari kuzatilgan. Zilzila episentri poytaxt Port-o-Prensdan 125 kilometr g‘arbda joylashgan. Gaiti bosh vaziri Ariel Anri mamlakatda bir oylik favqulodda holat e’lon qildi.

Avvalroq qurbonlar soni 1297 kishiga, keyinroq 1419 kishiga yetgani, ularning soni yana oshishi mumkinligi haqida xabar qilingandi.