Gaitida yuz bergan zilzila qurbonlari soni 1297 kishiga yetdi (foto)

Gaitida yuz bergan 7,2 magnitudali zilzila qurbonlari soni 1 297 kishiga yetdi. Bu haqda mamlakat fuqaro mudofaasi boshqarmasiga tayanib, CNN xabar berdi.

Halok bo‘lganlarning aksariyati Janubiy departamentga to‘g‘ri keladi – 1 054. Yana 119 qurbon Grand-Ans departamenti aholisi orasida qayd etilgan. Nip departamentida 122 kishi, Shimoli – g‘arbiy departamentda ikki kishi hayotdan ko‘z yumgan.

Hukumat ma’lumotlariga ko‘ra, 5,7 mingdan ortiq odam jarohatlangan, ulardan 3,2 ming kishi kasalxonaga yotqizilgan. Vayronalar ostidan odamlarni qidirish davom etmoqda.

Zilzila oqibatida qariyb 13 700 ta inshoot butunlay vayron bo‘lgan, yana 13 785 ta uy shikastlangan.

Birlashgan Millatlar Tashkiloti (BMT) Gaitidagi zilzila qurbonlariga yordam berish uchun kamida 8 million dollar ajratadi. Bu haqda BMT bosh kotibining gumanitar masalalar bo‘yicha o‘rinbosari Martin Griffits Twitter’da ma’lum qildi.

“Gaitida yuz bergan zilzilaga gumanitar yordam ko‘rsatishni qo‘llab-quvvatlash uchun Favqulodda vaziyatlarda ish ko‘rish markaziy fondidan 8 million dollar ajratmoqdaman. Bu mablag‘ tabiiy ofatdan zarar ko‘rgan odamlarga tibbiy yordam, toza suv, vaqtinchalik boshpana va sanitariya choralari uchun yuboriladi ”, — deb yozadi u.

14-avgust kuni Gaiti qirg‘oqlarida 7,2 magnitudali zilzila sodir bo‘lgandi. Zilzila epitsentri poytaxt Port-o-Prensdan 125 km g‘arbda joylashgan. Gaiti bosh vaziri Ariel Anri mamlakatda bir oylik favqulodda holat e’lon qildi.