Туркманистон президенти Гурбангули Бердимуҳамедов 12 декабрь куни Халқаро бетарафлик куни шарафига Бетарафлик монументи пойига гул қўйиш маросимидан сўнг Ашхобод қабул марказида ҳукумат ва парламент аъзолари ҳамда хорижий дипломатлар иштирокида зиёфат уюштирди. Бу ҳақда Туркманистон давлат ахборот агентлигига таяниб, «Хроника Туркменистана» хабар берди.
Туркманистон раҳбари турли мақоллар билан бойитилган табрик нутқида меҳмонларга туркман бетарафлигининг минг йиллик илдизлари, шунингдек, Ахалтеке отлари, гиламлари, алабай итлари ҳақида сўзлаб берди.
Туркманистон бутун дунёда тинчликка интилаётганини, уруш ҳеч қачон яхшиликка олиб келмаслигини таъкидлаган Бердимуҳамедов шу муносабат билан «Яшасин тинч ҳаёт!» шеърини ёзганини маълум қилди.
Шеър матни «Нейтралний Туркменистан» газетасида чоп этилган.
Шундан сўнг концерт бошланди, унинг давомида «Қорақум» қўшиғи ва сўзлари Бердимуҳамедов томонидан ёзилган қўшиқлар янгради. Давлат раҳбарининг ўзи аввалари қўшиқларини омма олдида ижро этган бўлса, бу гал чиқиш қилмаган ёки унинг ижроси телекамералар объективига тушмаган, деб ёзади «Хроника Туркменистана».
Туркманистон давлат ахборот агентлигининг хабарига кўра, концертнинг якуний қисми Аркадағ — Бердимуҳамедовнинг тиним билмас фаолиятига бағишланган қўшиққа айланиб кетган.
Аввалроқ маҳаллий матбуотда туркман шоираси Гўзел Шагулеванинг анъанавий тарзда Бердимуҳамедовга, унинг шеърий ва мусиқий истеъдодига бағишланган янги асари чоп этилганди.
«Эсингизда бўлса, Янги йил арафасида Қаҳрамон-Аркадағ мухлисларига ўз композициясидан иборат мусиқий альбомини совға қилганди. Кўплаб мухлислар қатори мен ҳам буни эшитишни ўзим учун катта завқ деб биламан. Менга бу жуда зарур! Мен қўшиқни, мусиқани жуда интиқлик билан кутгандим», — деб ёзади шоира.
Изоҳ (0)