Gaitidagi zilzila qurbonlari soni 1941 kishiga yetdi, jarohatlanganlar esa 9 mingdan ko‘p. Bu haqda respublika Fuqaro muhofazasi boshqarmasiga tayanib CNN xabar berdi.

Foto: AP Photo

“17-avgust holatiga ko‘ra, Fuqaro muhofazasi boshqarmasi 1941 kishining o‘limini qayd etdi: 1597 kishi — Janub departamentida, 205 kishi Grand-Ans departamentida, 137 kishi Nipp departamentida va ikki kishi Shimoli-g‘arb departamentida. Shuningdek, 9 mingdan ortiq yaradorlar ro‘yxatga olindi ”, — deyiladi boshqarma bayonotida.

Rasmiylarga ko‘ra, mintaqadagi 100 mingdan ortiq bino to‘liq yoki qisman vayron bo‘lgan; ayni paytda qutqaruvchilar vayronalar ostidan odamlarni qidirishda davom etmoqda.

Hafta boshida Gaiti qirg‘oqlariga urilgan “Greys” tropik bo‘roni tufayli qidiruv-qutqaruv ishlari vaqtincha to‘xtatilgandi. Bo‘ron mamlakatning janubi-g‘arbiy qismiga — zilziladan eng ko‘p zarar ko‘rgan hududlarga ta’sir qilgan.

Agentlik ma’lumotlariga ko‘ra, jabrlanganlarning ko‘pchiligi issiqda tibbiy yordamni uzoq kutib qolmoqda, chunki sog‘liqni saqlash tizimi bunchalik ko‘p yaradorlarga dosh bera olmayapti.

CNN YuNISEFga tayanib xabar berishicha, Gaitidagi zilziladan 1,2 millionga yaqin odam zarar ko‘rgan, ularning deyarli yarmi bolalar. “Greys” bo‘roni esa suv, uy-joy va boshqa asosiy xizmatlardan foydalanishni yanada murakkablashtirmoqda.

“Zilzila tufayli hamma narsasidan mahrum bo‘lgan son-sanoqsiz oilalar hozir toshqin tufayli tom ma’noda suvga cho‘kib ketdi”, — dedi YuNISEFning Gaitidagi vakili Bruno Maes.

Gaitida 14-avgust, shanba kuni 7,2 magnitudali zilzila yuz bergandi. Uning ketidan ketma-ket aftershoklar, xususan, 5,2 magnitudali takroriy yerosti silkinishlari kuzatilgan. Zilzila episentri poytaxt Port-o-Prensdan 125 kilometr g‘arbda joylashgan. Gaiti bosh vaziri Ariel Anri mamlakatda bir oylik favqulodda holat e’lon qildi.

Avvalroq qurbonlari soni 1297 kishiga, keyinroq 1419 kishiga yetgani, ularning soni yana oshishi mumkinligi xabar qilingandi.