Перу прокуратураси президент Педро Кастилиони лавозимни ошириш ишларига аралашганликда гумонлаб, сўроққа тутмоқчилигини маълум қилди. Бу ҳақда Reuters хабар берди.
Педро Кастилио
Фото: Reuters
Агентлик маълумотларига кўра, прокурорлар Кастилиони 14 декабрь куни сўроқ қилишни режалаштирмоқда. Бунга сабаб шуки, икки собиқ ҳарбий раҳбар гўёки президент тавсия қилган баъзи амалдорларни лавозимга кўтаришдан бош тортгани учун ўз вазифаларидан озод этилганини айтган.
Шунингдек, маҳаллий оммавий ахборот воситаларида эълон қилинган хабарларга кўра, Кастилио гўёки ўзининг шахсий уйида учрашувлар ўтказган ва уларни жамоат кун тартибига киритмаган. Сиёсатчининг ўзи ҳар қандай қонунбузарликларни рад этиб, учрашувлар шахсий бўлганини таъкидламоқда.
Эслатиб ўтамиз, ўтган ҳафта прокурорлар пойтахт Лимадаги ҳукумат саройида тинтув ўтказганди, у ерда Кастилионинг офиси жойлашган. Тинтув давомида офиснинг ваннахонасидан катта маслаҳатчига тегишли бўлган 20 минг доллар нақд пул топилган. Кастилио маслаҳатчини ишдан бўшатди ва унинг маъмурияти порахўрлик билан курашишга содиқлигини айтди.
Ҳозирги айбловлар аввалроқ бир гуруҳ қонунчиларнинг Кастилиога қарши импичмент эълон қилиш ҳақида билдирган таклифига босимни кучайтириши мумкин.
Собиқ қишлоқ ўқитувчиси, «Озод Перу» сўл радикал партияси вакили Педро Кастилио 6 июнь куни бўлиб ўтган президентлик сайловларида ғалаба қозонганди. Айрим таҳлилчилар Кастилиони «Перу тарихидаги энг сўл президент» деб атайди. Қайд этилишича, давлат раҳбари президентлик маошидан воз кечиб, ўқитувчилик маошига яшашни давом эттиришга ваъда берган. Бироқ сайлов кампанияси давомида у кўпроқ иқтисодий барқарорлик ва консерватив қадриятларга эътибор қаратганди.
Маълумот учун, мис ишлаб чиқариш бўйича дунёда иккинчи ўринда турадиган Перуда 2016 йилдан бери бешта президент алмашган.
