«Путиннинг йиллик матбуот анжуманига хорижий агентлар рўйхатидаги ОАВ вакиллари ҳам таклиф қилинади» — Песков

Кремль «хорижий агент» деб эълон қилинган оммавий ахборот воситалари ходимларини Владимир Путиннинг йиллик матбуот анжуманида иштирок этишга таклиф қилади, лекин ҳаммасини ҳам эмас. Бу ҳақда Россия президентининг матбуот котиби Дмитрий Песков журналистларга берган интервьюсида маълум қилди.

«Ҳа, шубҳасиз (таклиф қиламиз). Лекин албатта, ҳаммасини эмас, хорижий агентлар жуда кўп. Аммо асосий оммавий ахборот воситалари, жумладан, президентлик мавзусини ёритишда фаол иштирок этадиганлар — ҳа, улар таклиф қилинади. Бу мақом уларнинг фаолиятига тақиқ қўйиш эмас, буни бир неча бор такрорлаганмиз», — деди Песков.

Кремль матбуот котиби тадбирга «хорижий агентлар» дея эълон қилинган айнан қайси ОАВ вакиллари таклиф этилишига аниқлик киритмади.

Владимир Путиннинг бу йилги катта матбуот анжумани 23 декабрь куни Манежда бўлиб ўтади. Аввалроқ Песков давом этаётган пандемия шароитида Кремль матбуот анжумани иштирокчилари сонини қисқартиришга ва унга бепул аккредитацияни бекор қилишга қарор қилганини айтганди. Президент маъмурияти тадбирга 500 нафардан ортиқ бўлмаган журналистларни таклиф қилмоқчи. Уларнинг барчаси учтадан ПЗР-тестини топшириши керак.

Эслатиб ўтамиз, октябрь охирида АҚШ ва унинг НАТОдаги иттифоқчилари, шунингдек, Украина Россияни «мустақил журналистлар ва оммавий ахборот воситаларига нисбатан таъқиблари кучайгани» учун танқид қилганди. Уларнинг фикрича, Россия ҳукумати россияликларнинг мустақил журналистикадан фойдаланишини чекламоқчи ва шу мақсадда мамлакатда хорижий ОАВ агентлари тўғрисида қонун жорий қилган