АҚШ Молия вазирлиги Беларусь ва Европа Иттифоқи чегарасида юзага келган миграция инқирози сабаб 20 кишига, 12 та ташкилот ва уч нафар беларус самолётига нисбатан санкцияларни жорий этди, деб хабар беради Meduza. Молия вазирлигининг версиясига кўра, янги санкцияга алоқадорлар Евроиттифоққа ноқонуний миграцияни ташкиллаштиришда иштирок этган.
АҚШнинг санкциялар рўйхатидан бошқалар қатори «Президент спорт клуби» раҳбари Александр Лукашенконинг ўртанча ўғли Дмитрий ҳам киритилган (ташкилотнинг ўзи ҳам рўйхатдан ўрин олган). Бундан ташқари, АҚШ «Беларусь калий компанияси» «Трансавиаэкспорт», «Славкалий» ва «Белтехекспорт» компанияларига нисбатан ҳам санкция қўллаган.
Евроиттифоқ расмийлари 11 та ташкилот ва 17 нафар жисмоний шахсга, жумладан, Беларусь авиакомпанияси «Belavia» ва Суриянинг Cham Wings авиаташувчисига, мамлакат ТИВ ва чегара хизмати ходимлари, судьяларга санкция жорий этган. Санкцияларга, шунингдек, Буюк Британия ва Канада ҳам қўшилган.
АҚШ, ЙИ, Буюк Британия ва Канаданинг қўшма баёнотида «Лукашенко режимидан Евроиттифоқ билан чегарада ноқонуний миграцияни ташкиллаштиришни зудлик билан ва тўлиқ тўхтатиш» талаб қилинган.
Эслатиб ўтамиз, 8 ноябрь куни эрталаб Беларусь ва Европа Иттифоқи давлатлари чегарасида вазият кескинлашди. Беларусь оммавий ахборот воситалари мамлакатнинг Польша билан чегараси томонга ҳаракатланаётган муҳожирлар карвони акс этган видеоларни эълон қилди. 11 ноябрь куни Буюк Британия, АҚШ ва Европа Иттифоқи давлатлари Беларусь ҳукуматини Польша—Беларусь чегарасидаги миграция инқирозини сунъий равишда яратганликда айблади.
Мавзуга доир:
Изоҳ (0)