Сальвадорнинг қирғоқ зонасида бортида мамлакат мудофаа вазирининг ўғли Херардо Мерино бўлган ҳарбий самолёт ҳалокатга учради. Бу ҳақда Сальвадор қуролли кучларига таяниб, «РБК» хабар берди.
«Сизларга чуқур афсус билан маълум қиламизки, ҳаво кучларимиз самолёти қирғоқбўйи зонасида топшириқни бажараётиб ҳалокатга учради. Биз уч нафар экипаж аъзосини, жумладан, вазирнинг ўғли — лейтенант Херардо Меринони қидирмоқдамиз», — дейилади Қуролли кучларнинг Twitter’даги хабарида.
Кейинроқ Сальвадор президенти Найиб Букеле Меринонинг жасади ва бортнинг бўлаклари топилганини маълум қилди. Маълумот президент қароргоҳида тасдиқланди. Ҳодисада Херардо Меринодан ташқари, капитан Родриго Эскобар Грималди ва лейтенант Серрано Минеро ҳам ҳалок бўлган.
Июль ойида Филиппинда 92 кишини олиб кетаётган ҳарбий самолёт ҳалокатга учраган эди. Ҳодиса қурбонлари сони 45 кишига етган.
Шунингдек, Тожикистон Чегара хизматининг Ми-8 вертолёти 4 август куни россиялик туристларни қутқариш учун учиб кетиб, ҳалокатга учрагани хабар қилинганди. Оқибатда бир киши — учувчи ҳалок бўлиб, яна тўрт киши турли даражада жароҳатланган.
Изоҳ (0)