2 декабрь куни Берлинда Ангела Меркелнинг Германия канцлери лавозимидан кетиши муносабати билан тантанали маросим бўлиб ўтди, деб хабар беради Meduza. «Кечки шафақ» номли маросимни бундесвер, Германия қуролли кучлари ташкиллаштирган. Ушбу маросим — Меркелнинг 16 йиллик фаолиятидан кейин ҳукуматни тарк этишидан олдинги муҳим воқеадир. У канцлер лавозимини расман 8 декабрь куни тарк этади.
Коронавирус тарқалишининг олдини олиш бўйича жорий этилган чекловлар сабаб маросим чекланган форматда ўтказилган. Унга 200 яқин одам, жумладан, Меркелнинг бошқарув даврида федерал вазирликларда ишлаган 52 киши ҳам ташриф буюрган.
Меркелнинг қисқа нутқидан сўнг, ҳарбий оркестр бир нечта композицияни ижро этди, жумладан, уларнинг учтасини Меркель танлаган. Канцлер кетишидан олдин «немис панкининг онаси» Нина Хагеннинг «Du hast den Farbfilm vergessen», шунингдек, Хильдегард Кнефнинг «Fur mich soll’s rote Rosen regnen» қўшиқларини ва насронийлар мадҳияси «Großer Gott, wir loben dich»ни ижро этишни сўраган.
«Кечки шафақ» маросими — немис ҳарбийлар фуқароларга кўрсатиши мумкин бўлган энг олий ҳурмат намунасидир. Унинг тарихи XVI асрга бориб тақалади, бироқ немис канцлерлари бунга 1998 йилдан бошлаб, Германия ҳукумати тепасидан Гельмут Коль кетганиден бери мушарраф бўлган.
Маълумот учун, Меркель 2005 йилдан бери (тўрт муддат) Германия канцлери бўлган, шунингдек, Христиан-Демократик Иттифоқига (ХДИ) раислик қилган. У 2018 йилда кейинги муддати тугагач канцлерлик лавозимидан кетишини эълон қилганди.
27 сентябрь куни бўлиб ўтган Германиядаги парламент сайловларида амалдаги молия вазири Олаф Шольц раҳбарлигидаги Социал-демократик партия (ГСДП) ғалаба қозонди. Унга сайловчиларнинг 25,7 фоизи овоз берди, ушбу натижага мувофиқ у янги Бундестагда 206 та ўринга эга бўлади.
26 октябрь куни Германия президенти Франк-Вальтер Штайнмайер Меркелга ҳукумат раҳбари сифатидаги муддати расман тугагани тўғрисидаги мактубни топширди.
Изоҳ (0)