Россия Афғонистоннинг этносиёсий кучларини мамлакатда ички миллий низо қўзғатувчи ҳаракатлардан тийилишга чақиради. Бу ҳақда 3 ноябрь куни бўлиб ўтган брифингда Россия Ташқи Ишлар Вазирлиги расмий вакили Мария Захарова маълум қилди.
«Бизнинг фикримизча, ҳозирги босқичда мамлакатнинг турли этносиёсий кучлари афғонлараро низони қўзғатувчи хатти-ҳаракатлардан тийилиши керак», — деди у Миллий қаршилик фронтининг «Толибон» билан жанговар ҳаракатларни қайта бошлашга тайёрлиги ҳақидаги маълумотга фикр билдирар экан.
Захарованинг таъкидлашича, зиддият томонлари «Афғонистон ва унинг атрофидаги минтақада барқарор тинчлик, барқарорлик ва хавфсизликни тиклаш учун ўзаро тушуниш ва миллий ярашув йўлларини ҳам излаши керак».
У, шунингдек, 2 ноябрь куни ИШИД томонидан Кобулдаги ҳарбий госпиталда содир этилган, натижада 20 га яқин одам ҳалок бўлиб, 40 дан ортиқ фуқаро жароҳатланган терактни қоралади.
Шу билан бирга, у Афғонистон муваққат ҳукумати томонидан нормал тинч ҳаёт ўрнатиш учун хавфсизликни таъминлаш борасида амалга оширилаётган саъй-ҳаракатларни қайд этди.
«Шарқий Нангарҳор вилоятида ИШИДнинг 60 дан ортиқ жангариси қуролларини ташлаб, ‘Толибон’ расмийларига таслим бўлди. Ғарбнинг афғон миллий активларини музлатиб қўйишига қарамай, мамлакат Марказий банки фойда ва зарарларни банк омонатчилари ва қарз олувчилар ўртасида тақсимлашни, кредитлар ва гаров таъминоти бўйича фоизлар олинмаслигини кўзда тутувчи исломий банк тизимини жорий этиш режалари ва бошқа тафсилотлар тўғрисида эълон қилди », — деди Мария Захарова.
Аввалроқ «Толибон» ҳаракати Россия президенти Владимир Путиннинг ҳаракат етакчиларини террорчилар сафидан чиқариш эҳтимоли ҳақидаги баёнотини олқишлаган эди. Путин Афғонистондаги вазиятнинг ривожланишига қараб, бирдамликда уларни террорчилар рўйхатидан чиқариш тўғрисида қарор қабул қилинишини айтган.
Бунга қадар Путин «Толибон» учун наркобизнесдан тушадиган даромаддан воз кечиш осон бўлмаслигини ҳам айтган. «Афғонистон дунёдаги энг йирик афюн таъминотчиси бўлиб қолмоқда. Гиёҳванд моддалар етиштиришга қарши курашишни ваъда қилганига қарамай, ‘Толибон’ аслида буни уддалаяптими, ўзи бу билан шуғулланяптими ёки шуғулланишни истамаяптими, менга қоронғи. Бугун, айниқса, иқтисодиётдаги инқирозли вазиятда бундай даромад манбаидан воз кечиш осон бўлмайди », — деди Путин 15 октябрь кун бўлиб ўтган Мустақил Давлатлар Ҳамдўстлиги саммитида.
Россия президенти, шунингдек, «Толибон» билан мулоқот қилиш зарурлигини, лекин уларни тан олишга шошилмаслик кераклигини билдирган.
Изоҳ (0)