Туркияда мамлакат президенти Ражаб Тоййиб Эрдўғон ҳақида Twitter’да «ёлғон ахборот берувчи постлар» тарқалгани сабабли 30 кишига нисбатан жиноий иш очилди. Бу ҳақда Туркия Хавфсизлик бош бошқармаси баёнотига таяниб, «РИА Новости» хабар берди.
Маҳаллий ОАВ хабарларида аниқлик киритилишича, Twitter’да Туркиянинг амалдаги президенти тилга олиниши билан боғлиқ ҳолда #death (ўлим) хештеги ишга туширилган.
«Хештег остида президентимизнинг шаъни ва қадр-қимматини камситувчи нотўғри маълумотлар ва ҳар хил материаллар тарқатган 30 нафар шахс аниқланди. Уларга нисбатан жиноят иши қўзғатилиб, тергов ҳаракатлари олиб борилмоқда», — дейилади хабарда.
Шунингдек, ёлғон ахборотларни ўз ичига олган хабарлар бўйича зарур текширувлар ўтказилаётгани, натижалари адлия органларига юборилаётгани маълум қилинган.
Эслатиб ўтамиз, Туркияда сентябрь бошида Эрдўғоннинг «Дунё адолатлироқ бўлиши мумкин» номли янги китоби сотувга чиқарилганди. Китобда Эрдўғон глобал сиёсат муаммоларига, хусусан, адолатсизлик, миграцион инқироз, халқаро терроризм ва исломофобия, дискриминация ва икки томонлама стандартларга эътибор қаратади. Эрдўғоннинг сўзларига кўра, «Туркиянинг мақсади — ҳокимиятда бўлганларнинг ҳақ бўлиши эмас, аксинча, ҳақ бўлганларнинг ҳокимиятда бўлишини таъминловчи тизимни ўрнатиш».
Мавзуга доир:
- Туркия президенти АҚШ ва Германия сингари 10 та етакчи мамлакатлар элчиларини persona non grata деб эълон қилишни буюрди. Улар туркиялик ҳуқуқ ҳимоячисининг ҳибсдан озод этилишини талаб қилганди
- Эрдўғон АҚШни Афғонистон каби Сурия ва Ироқдан ҳам ўз қўшинларини олиб чиқишга чақирди
- Эрдўғон БМТда Қримнинг Россияга қўшиб олинишини тан олмаслигини билдирди
Изоҳ (0)