Япония бош вазири Фумио Кисида ўз партияси томонидан эълон қилинган йўналишни дарҳол амалга оширишга киришишини, шунингдек, ҳукуматнинг навбатдаги таркиби тасдиқлангунга қадар мамлакат Ташқи ишлар вазирлигини шахсан бошқариб туришини маълум қилди, деб хабар беради «РИА Новости».
Эслатиб ўтамиз, 4 октябрь куни Япония парламентининг қуйи палатаси кўпчилик овоз билан мамлакат ҳукмрон Либерал-демократик партияси (ЛДП) раҳбари Фумио Кисидани Япониянинг 100-бош вазири этиб сайлади.
«Умумий сайловларда жамоатчилик томонидан қўллаб-қувватландик. Эълон қилинган сиёсий йўналишни кечиктирмасдан амалга оширишга киришмоқчиман», — дейди Кисида.
Бош вазир, шунингдек, ТИВ раҳбари вазифасини бажараётган Тосимицу Мотеги ҳукмрон Либерал-демократик партияси (ЛДП) бош котиби лавозимига тайинланиши мавзусига тўхталиб ўтган.
«ТИВ раҳбари Мотеги партиянинг бош котиби лавозимига тасдиқлангани муносабати билан бугунги йиғилишда ўз лавозимини тарк этади. Агарда бу амалга ошса, мен иккита позицияни бирлаштириш ниятидаман ва Вазирлар Маҳкамасининг кейинги таркиби тасдиқлангунга қадар ТИВ раҳбари вазифаларини бажариб турмоқчиман», — дейди Кисида.
Парламентнинг муҳим сессияси 10 октябрь куни чақирилиши кутилмоқда. Янги парламент мамлакат бош вазирини сайлаши керак, бу шунчаки расмиятчилик ҳисобланади, чунки Кисида партиясида депутатларнинг ярмидан кўп овози бор.
Шунингдек, бош вазир Кисида ўзининг иккинчи ҳукуматини шакллантиради. Ҳозирча унинг таркиби алмашиши ёки янгиланиши номаълум.
Аввалроқ Япония бош вазири Ёсихиде Суга бошчилигидаги ҳукумат тўлиқ таркибда истеъфога чиққан эди. Суга коронавирусга қарши курашга эътибор қаратиш мақсадида муддати тугагач, Япония бош вазири лавозимига қайта номзодини кўрсатмасликка қарор қилган. Август ойи бошида бош вазир фаолиятини маъқуллаш бўйича рейтинг энг паст кўрсаткичга (28 фоиз) тушиб кетганди. Бу, хусусан, мамлакатда бўлиб ўтган Олимпия ўйинлари фонида коронавирус дельта штаммининг тез тарқалиши туфайли рўй берган.
Изоҳ (0)