Франция президенти Эммануэль Макрон Германия канцлери вазифасини бажарувчи Ангела Меркелни Фахрий легион ордени билан тақдирлади. Франциянинг ушбу энг олий мукофотини топшириш маросими француз виночилик минтақаси ҳисобланадиган Бургундияда бўлиб ўтди.
«Менга жуда кўп нарсани ўргатганингиз учун сизга раҳмат айтмоқчиман. Қадрли Ангела, бизнинг Европамиз учун қилган барча меҳнатингиз учун ташаккур», — деди Макрон Ангела Меркелга Фахрий легион орденининг топширилиши муносабати билан сўзлаган нутқида.
Франция президенти Ангела Меркель канцлер сифатида фаолият юритиш мобайнида «барча тўнтаришларга қарамай» Европа бирлигини сақлашга ҳисса қўшганини таъкидлади.
Фахрий легион ордени Францияда 1802 йилда Наполеон Бонапарт томонидан таъсис этилган. У ҳарбийлар ҳамда фуқароларга тинчлик ва уруш даврида мамлакат олдидаги беқиёс хизматлари учун берилади, шунингдек, у билан бошқа давлатлар фуқаролари ҳам тақдирланиши мумкин.
26 сентябрь куни Германия Федератив Республикаси Бундестагига сайловлар бўлиб ўтди. Уларнинг якунларига кўра, 16 йилдан буён илк бор янги ҳукумат Ангела Меркелсиз тузилади. Айни дамда томонлар коалиция тузиш имкониятларини муҳокама қилмоқда.
Изоҳ (0)