Деҳқонобод туманида 42 та боқувчисини йўқотган оила фарзандларининг хатна тўйи ўтказиб берилди. Бу ҳақда «Дарё»га туман ҳокимлиги ахборот хизмати маълум қилди.
Таъкидланишича, 31 август куни шу муносабат билан туманда концерт дастури ташкил этилган.
«Президентимиз ташаббуси билан илгари сурилаётган саховат ва хайрия тадбирлари доирасида туманда рўйхатга олинган боқувчисини йўқотган оилаларнинг 42 нафар фарзандининг хатна тўйи ўтказилиб, уларга совға-салом улашилди. Яқинлари учун бир пиёла чой ташкил этилиб, дилдан суҳбатлашиш учун имконият яратилди», — дейди Деҳқонобод ҳокими Зоир Алиқулов.
Зоир Алиқуловнинг маълумот беришича, туманда бу каби тадбирлар беш йилдан бери ўтказиб келинмоқда.
«Ҳар йили давлатимиз Мустақиллиги кунида, шунингдек, Наврўз байрамида етим, боқувчисини йўқотган оилалар фарзандларининг тўйи ўтказиб берилади. Бу давлатимиз раҳбари Шавкат Мирзиёев ташаббуси билан бошланган тадбир бўлиб, ҳар бир туманда ўтказилиши анъана тусига кириб қолган», — дейди туман ҳокими.
Қайд этилишича, туманда байрам муносабати билан 10 та мактаб, 1 та боғча қайта қурилган бўлса, 54 та мактаб жорий таъмирдан чиққан. Шунингдек, таъмирталаб бўлиб қолган 5 та кўприк таъмирланиб, фойдаланишга топширилган.
Мавзуга доир:
- Тўқсон уч йилдан бери на эшитади, на гапира олади: Деҳқонобод тумани марказидан 200 км узоқликда жойлашган қишлоқда яшовчи отахон ҳаёти
- Деҳқонобод тумани ҳокимлиги Зоир Мирзаев ваъдасини бажармаётгани ҳақидаги мақолага муносабат билдирди
- Зоир Мирзаев танқидидан сўнг Деҳқонобод ва Шаҳрисабзда ҳам ҳокимликларни ўраб турган панжаралар олиб ташланди
Изоҳ (0)