Ўзбекистон мустақиллигининг 30 йиллиги муносабати билан вилоятларда ҳам байрам тантаналари бўлиб ўтди. «Дарё» мухбирлари байрам тадбирларининг эътиборга молик жиҳатларини суратга олди.
Қашқадарё вилояти
«Дарё»нинг Қашқадарё вилоятидаги мухбири Отабек Қўлдошевнинг вилоят раҳбари Зоир Мирзаев нутқидаги маълумотларга таяниб хабар беришича, Қашқадарёда 2021 йилда саноат ҳажми 18,5 триллион сўмга етказилиб, ўсиш 115 фоизни кўрсатган.
Тадбиркорлик учун жорий қилинган имтиёз ва префенсиялар, пандемия шароитида амалга оширилган қўллаб-қувватлашлар натижасида ўтган даврда 7282 та кичик бизнес субъекти янгидан ташкил қилиниб, ялпи ички маҳсулотда кичик бизнеснинг улуши 71 фоизга етказилган.
Қайд этилишича, ҳозирда вилоятнинг 11 та туманида 4 та тўқимачилик, 12 та тайёр трикотаж, 8 та ип-калава ишлаб чиқариш корхонаси қурилмоқда. Бунинг натижасида 7150 та янги иш ўрни яратилади ва пахтани қайта ишлаш даражаси амалдаги 53,2 фоиздан, 94,3 фоизга етказилади.
«Бу йил вилоятимиз тарихида биринчи марта давлат бюджетидан 2,4 триллион сўм маблағ ажратилиб, жами 2945 та объектда қурилиш-таъмирлаш ишлари олиб борилмоқда. Хусусан, 520,1 миллиард сўм маблағ ҳисобига жами 781 та мактабда қурилиш-таъмирлаш ишлари олиб борилмоқда, шундан 98 та мактаб биноси янгидан қурилмоқда», — деди байрам тадбирида сўз олган Зоир Мирзаев.
Таъкидланишича, аҳолини тоза ичимлик суви билан таъминлашга 432,4 миллиард сўм маблағ ажратилиб, ичимлик суви таъминоти 37 фоиздан 49 фоизга етказилган. Биргина, жами узунлиги 78,8 км бўлган Оқсув—Деҳқонобод сув тармоғига ажратилган 281,5 миллиард сўм маблағ ҳисобига 116 та қишлоқдаги 27 512 та хонадон ва 112,8 минг аҳоли тоза ичимлик суви билан таъминланган.
Вилоятда «Обод қишлоқ» ва «Обод маҳалла» дастурига кирган 30 та маҳалла учун ажратилган 626,3 миллиард сўм ҳисобига 26 225 хонадонга ичимлик суви кириб бориши, 27 721 та хонадонда электр таъминоти яхшиланиши, 170 та янги тадбиркорлик субъекти ташкил қилиниши, 15 та маҳалла биноси барпо этилиши режалаштирилган.
Бухоро вилояти
«Дарё»нинг Бухоро вилоятидаги мухбири Лайло Ҳайитованинг маълумот беришича, вилоятда ялпи ҳудудий маҳсулот 132 фоизга, саноат ишлаб чиқариш 118 фоизга, маҳаллий саноат 162 фоизга, қурилиш ишлари 185 фоизга ва хизматлар соҳаси 196 фоизга ҳамда асосий капиталга киритилган инвестициялар 2,2 баробарга ошган.
Вилоят ҳокими Ботир Зариповнинг маълумот беришича, ўтган беш йилда республика бюджетига берилиши керак бўлган жами 1,4 триллион сўм маблағ вилоят тасарруфида қолдирилган бўлиб, мазкур маблағлар аҳоли бандлигини таъминлаш, ободонлаштириш, туман-шаҳарлар инфратузилмасини ривожлантириш ва ижтимоий лойиҳаларга йўналтирилган.
Қайд этилишича, вилоятда ихтисослаштирилган мактаблар сони 18 тадан 51 тага етказилган ва сўнгги уч йилда 16 та янги ихтисослаштирилган мактаб ва мактаб-интернати, 1 та олий таълим муасасаси ташкил этилган.
Андижон вилояти
«Дарё»нинг Андижон вилоятидаги мухбири Умиджон Мамарасуловнинг маълумот беришича, вилоятнинг асосий байрам тадбири Андижон шаҳридаги ёзги амфитеатрида бўлиб ўтган.
Ҳоким ўз нутқида сўнги йилларда Андижон вилоятида амалга оширилаётган бунёдкорлик ишлари, хотин-қизлар, ёшларнинг бандлигини таъминлаш, тадбиркорликни қўллаб-қувватлаш борасида олиб борилаётган ишлар, эришилаётган натижалар ҳақида гапирган.
Изоҳ (0)