Наманганда ИИБнинг қайта ташкил этилган «Меҳнат ва шуҳрат» музейи фаолиятини бошлади. Бу ҳақда «Дарё» мухбири Азизбек Абдувалиев хабар бермоқда.
Мазкур музей раҳбари Фурқат Маҳмудовнинг айтишича, бу даргоҳ аслида 2002 йили вилоят ИИБнинг ўша пайтдаги бошлиғи Тоҳир Муллажонов буйруғи билан ташкил этилган. Бироқ ўтган қарийб 20 йил давомида мослашмаган, тор ва қоронғи хоналарда фаолият юритиб келган.
2021 йил май ойида музей учун кенг, ёруғ ва шинам алоҳида зал ажратиб берилди ҳамда муассаса ўзининг «иккинчи умрини» бошлади.
«Музейимиз соҳибқирон Амир Темур давридан то ҳозиргача бўлган муддатни ўз ичига олади. Қадим пайтлардаги миршаблар, ҳарбийлар кийган кийимлар, қурол-аслаҳаларни қидириб топдик. Байроқлар, погонлар, орден-медалларни тўпладик. Турли йилларда ички ишлар вазири, вилоят ИИБ бошлиғи бўлган раҳбарларнинг фотолари, улар ҳақидаги маълумотлар жамланди. Шунингдек, ички ишлар тизимидаги фаолияти давомида ҳалок бўлган марҳум ҳамкасбларимиз хотираси ҳам ёдга олинган», — дейди Фурқат Маҳмудов.
Музейнинг катта қисми бошқарма таркибидаги бўлинмаларнинг тарихи ва бугунги кунига бағишланган. Жумладан, Жиноят қидирув бошқармасига оид стендда митти фотоаппарат, диктофон ва камераларни, йўл ҳаракати хавфсизлиги бошқармасига оид стендда эса ўша пайтларда асосий ҳаракат воситаси бўлган мотоциклдан тортиб жезл ва тезлик ўлчагичларгача бор.
«Экспонатлар орасида ноёб ва тарихий қимматга эга бўлганлари кўп. Айтайлик, террорчилардан олинган ашёвий далиллар, хусусан, қўлбола қуроллар. Умуман олганда, қуролларнинг салмоқли коллекциясини тўплашга муваффақ бўлдик. Улар орасида 1891 йилга оид салкам бир метрли карабиндан тортиб, кафтдек келадиган митти тўппонча, ҳатто пулемётгача бор», — дейди музей раҳбари.
Ушбу музей келгусида янги экспонатлар билан бойиши, бу ерга ўқувчи-талабалар, соҳага қизиққан ёшлар учун экскурсиялар ташкиллаш кўзда тутилган.
Изоҳ (0)