Капитолийнинг етти нафар полиция ходими АҚШ собиқ президенти Дональд Трампни судга берди. Даъво аризаси Трампнинг бир қатор ёрдамчилари ва радикал гуруҳлар етакчилари январь ойида Капитолийга бостириб киргани юзасидан берилган.

Фото: Ru Herald

Полициячилар Капитолийдаги тартибсизликларни Трамп, унинг атрофидагилар ва дарддош радикаллар томонидан «қўзғатилган ва қўллаб-қувватланган ҳужум» деб атади ва бу Конгресснинг Жо Байден ғалаба қозонган президентлик сайлови натижаларини тасдиқлашига йўл қўймаслик мақсадида амалга оширилганини таъкилади.

«Ҳужумчиларнинг қонунга хилоф ҳаракатлари туфайли даъвогарларга шафқатсизларча ҳужум қилинган, тупурилган, кўздан ёш оқизувчи газ сепилган, шунингдек, улар ҳақоратларга дучор бўлган ва ҳаётига таҳдид қилинган. Ҳужумчилар қолдирган жароҳатлар даъвогарларда шу кунгача сақланиб қолмоқда», — дейилади хабарда.

Даъво аризасида кўрсатилишича, Трамп ўз тарафдорларини Капитолийга юборган, Капитолийдаги одамларга хавф солаётганини била туриб, уларни тартибсизликларни тўхтатишга чақирмаган, ҳужумдан кейин ҳам уларни қораламаган.

Капитолий полицияси ходимлари товон пули талаб қилмоқда, унинг миқдорини суд белгилаши таклиф қилинмоқда.

Бу Капитолий полициячиларининг Трампга қарши биринчи даъвоси эмас. Аввалроқ икки полиция ходими собиқ президентдан Капитолийга уюштирилган ҳужум учун жами 150 минг доллар талаб қилганди.

Эслатиб ўтамиз, 6 январь куни АҚШ Конгресси аъзолари Дональд Трампнинг президентлик сайловларида мағлуб бўлганини тасдиқлаш учун йиғилган вақтда Трампнинг тарафдорлари Конгрессга бостириб кирган. Полиция бир неча соат ўтибгина намойишчиларни Капитолийдан ҳайдаб чиқаришга муваффақ бўлган. Ҳуқуқ-тартибот органлари ходимлари ўқотар қурол, дубинка, кўздан ёш оқизувчи газдан фойдаланган. Капитолийнинг хавфсизлик ходими билан биргаликда, беш киши ҳалок бўлган.

Капитолийга ҳужум ҳақидаги иш бўйича 500 дан ортиқ америкаликка айблов эълон қилинган. Июль ойининг охирида ушбу иш бўйича биринчи марта қамоқ жазоси тайинланди — 38 ёшли Пол Хожкинс саккиз ойлик қамоққа ҳукм қилинди.