Туркманистон президенти Гурбангули Бердимуҳамедов 25 август куни Вазирлар Маҳкамасининг кенгайтирилган йиғилишини ўтказди ва амалдорлар билан Туркманистон Фавқулодда комиссиясининг касалликлар тарқалишига қарши курашиш бўйича фаолиятини муҳокама қилди.
Телевизион кадрлардан кўриниб турибдики, йиғилишда президентдан ташқари барча иштирокчилар ниқоб таққан.
Давлат раҳбарининг баёнотига кўра, «ҳозир бутун дунёни қамраб олган коронавируснинг Туркманистонга кириб келиши ва тарқалишининг олдини олиш чораларини кучайтириш зарур; вазирликлар, идораларда, мулкчилик шаклидан қатъи назар, барча корхоналарда ушбу вирусга қарши кураш чоралари тўғри ташкил этилиши, санитария ва эпидемиология қоидаларига қатъий риоя қилиниши шарт.
Шу билан бирга, Бердимуҳамедов эпидемия Туркманистонга ҳали кириб келмаган, дея таъкидлашда давом этмоқда. Шунга қарамай, президент оилавий шифокорлар ва оммавий ахборот воситалари орқали фуқароларга «мамлакатнинг ҳамма бурчакларида» профилактик чора-тадбирларини кўриш зарурлиги ҳақида тушунтириш ўтказишни буюрди, оммавий тадбирлар ўтказишни чеклаш бўйича таклифлар тайёрлашга кўрсатма берди.
Йиғилишда, шунингдек, давлат раҳбари бир қатор мансабдор шахсларнинг ишдан олинишини эълон қилди.
Бош вазирнинг фан ва таълим, соғлиқни сақлаш ва спорт масалалари бўйича ўринбосари Мамметмурат Гелдиниязов ишидаги жиддий камчиликлари учун ишдан олинди. Унинг ўрнига Сапартурди Тойлиев тайинланди. У бир вақтнинг ўзида Туркманистон Фанлар академияси раҳбари вазифаларини бажаради.
Таълим вазири Ўразгелди Қурбонов ҳам ишидаги жиддий камчиликлари учун лавозимидан озод қилинди, унинг ўрнига Гурбангул Атаева тайинланди. Бунга қадар Атаева Аёллар уюшмаси марказий кенгаши ва Туркманистон касаба уюшмалари миллий марказини бошқарган.
Арсланқилич Қиличов соғлиқни сақлаш ва тиббиёт саноати вазирининг ўринбосари — Давлат санитария-эпидемиология хизмати раҳбари лавозимидан озод этилди. Унинг ўрнига Мурат Маммедов тайинланди. Маммедов бунгача юқумли касалликлар марказлари бошқармаси бош директори бўлган, унинг ўрнини Аннамурат Режепов эгаллади.
Ишидаги жиддий камчиликлари учун Туркманистон Давлат миграция хизмати раиси, подполковник Бекмурат Овезов вазифасидан олинди. Унинг лавозимини Назар Атагараев эгаллади.
Мустақил ОАВ хабарларига кўра, Туркманистонда COVID-19 пандемиясининг навбатдаги авж олиши кузатилмоқда. Ашхободда бозорлар ва кафелар қайта ёпилган, жамоат транспорти дезинфекция қилинмоқда, полиция ниқобсиз одамларни жаримага тортмоқда, корхона ва ташкилотлар ходимларидан эмланганлик гувоҳномаси талаб қилиниб, акс ҳолда уларга ишдан бўшатиш билан таҳдид қилинмоқда. Ҳудудларда шифохоналар тўлган ва ходимлар етишмаяпти. Туркманистон мустақиллигининг 30 йиллигига бағишланган тантаналарда давлат хизматчиларининг иштирок этиш-этмаслиги савол остида.
Аввалроқ Россиянинг Ашхободдаги элчихонаси масофадан ишлашга ўтишини эълон қилган.
Изоҳ (0)