Kapitoliyga uyushtirilgan hujumda jarohat olgan politsiyachilar Trampni sudga berdi

Kapitoliyning yetti nafar politsiya xodimi AQSh sobiq prezidenti Donald Trampni sudga berdi. Da’vo arizasi Trampning bir qator yordamchilari va radikal guruhlar yetakchilari yanvar oyida Kapitoliyga bostirib kirgani yuzasidan berilgan.

Politsiyachilar Kapitoliydagi tartibsizliklarni Tramp, uning atrofidagilar va darddosh radikallar tomonidan “qo‘zg‘atilgan va qo‘llab-quvvatlangan hujum” deb atadi va bu Kongressning Jo Bayden g‘alaba qozongan prezidentlik saylovi natijalarini tasdiqlashiga yo‘l qo‘ymaslik maqsadida amalga oshirilganini ta’kiladi.

“Hujumchilarning qonunga xilof harakatlari tufayli da’vogarlarga shafqatsizlarcha hujum qilingan, tupurilgan, ko‘zdan yosh oqizuvchi gaz sepilgan, shuningdek, ular haqoratlarga duchor bo‘lgan va hayotiga tahdid qilingan. Hujumchilar qoldirgan jarohatlar da’vogarlarda shu kungacha saqlanib qolmoqda”, — deyiladi xabarda.

Da’vo arizasida ko‘rsatilishicha, Tramp o‘z tarafdorlarini Kapitoliyga yuborgan, Kapitoliydagi odamlarga xavf solayotganini bila turib, ularni tartibsizliklarni to‘xtatishga chaqirmagan, hujumdan keyin ham ularni qoralamagan.

Kapitoliy politsiyasi xodimlari tovon puli talab qilmoqda, uning miqdorini sud belgilashi taklif qilinmoqda.

Bu Kapitoliy politsiyachilarining Trampga qarshi birinchi da’vosi emas. Avvalroq ikki politsiya xodimi sobiq prezidentdan Kapitoliyga uyushtirilgan hujum uchun jami 150 ming dollar talab qilgandi.

Eslatib o‘tamiz, 6-yanvar kuni AQSh Kongressi a’zolari Donald Trampning prezidentlik saylovlarida mag‘lub bo‘lganini tasdiqlash uchun yig‘ilgan vaqtda Trampning tarafdorlari Kongressga bostirib kirgan. Politsiya bir necha soat o‘tibgina namoyishchilarni Kapitoliydan haydab chiqarishga muvaffaq bo‘lgan. Huquq-tartibot organlari xodimlari o‘qotar qurol, dubinka, ko‘zdan yosh oqizuvchi gazdan foydalangan. Kapitoliyning xavfsizlik xodimi bilan birgalikda, besh kishi halok bo‘lgan.

Kapitoliyga hujum haqidagi ish bo‘yicha 500 dan ortiq amerikalikka ayblov e’lon qilingan. Iyul oyining oxirida ushbu ish bo‘yicha birinchi marta qamoq jazosi tayinlandi — 38 yoshli Pol Xojkins sakkiz oylik qamoqqa hukm qilindi.