Қозоғистондаги портлаш қурбонлари сони 9 кишига етди. Назарбоев мудофаа вазири ва Жамбил ҳокимига қўнғироқ қилди

Қозоғистоннинг Жамбил вилояти Тараз шаҳри ташқарисида жойлашган ҳарбий омбордаги портлашлар қурбонлари сони тўққиз кишига етди, деб ёзади Tengrinews.

«Жамбил вилоятининг Байзак туманида жойлашган ҳарбий қисмдаги портлаш оқибатида, сўнгги маълумотларга кўра, тўққиз киши ҳалок бўлган. Булар ФВВ, ҳарбий қисм, ҳарбийлаштирилган соқчилик ва ҳарбий прокуратура ходимларидир. Бедарак йўқолган тўрт киши ҳақидаги маълумотлар аниқлаштирилмоқда», — дея маълум қилди мамлакат Фавқулодда вазиятлар вазирлиги расмий вакили Талгат Уали.

Дастлабки ахборотга кўра, касалхоналарга Фавқулодда вазиятлар департаментининг 49 нафар ходими келиб тушган. Воқеа жойида вазир раҳбарлигидаги ФВВ тезкор гуруҳи иш олиб бормоқда.

Яна бир неча киши алоқага чиқмаяпти. Қидирув ишлари амалга оширилмоқда.

Бу орада Нурсултон Назарбоев мудофаа вазири Нурлан Ермекбаев билан телефон орқали суҳбатлашди. Мулоқот чоғида Хавфсизлик кенгаши раисига Байзак туманидаги фавқулодда ҳолат оқибатларини бартараф этиш ва минтақа аҳолиси хавфсизлигини таъминлаш бўйича кўрилаётган чоралар ҳақида маълумот берилган.

Қозоғистон биринчи президенти Жамбил вилояти ҳокими Бердибек Сапарбаев билан ҳам гаплашди.

Қозоғистонда портлаш 26 август куни содир бўлганди. Воқеа жойида ёнғин оқибатларини бартараф этиш бўйича тезкор штаб тузилган, мудофаа вазири, фавқулодда вазиятлар вазири, шунингдек, ички ишлар вазирининг ўринбосари етиб келган.

Аввалроқ портлаш оқибатида беш аскар ҳалок бўлгани, жароҳатланганлар сони 90 кишига етгани хабар берилганди. Ҳарбий омборлар ҳудудида 500 тоннадан ортиқ тротил (портловчи модда) сақланарди. Ҳарбий қисмда ёнғин давом этмоқда, 1,2 мингга яқин одам эвакуация қилинди. Расмийлар ҳодиса сабаби сифатида қасддан ўт қўйиш версиясини истисно қилмаяпти.