Авиакомпаниялар Афғонистон ҳаво ҳудудини четлаб учишни бошлади

Авиакомпаниялар Афғонистон ҳаво ҳудудини четлаб ўтиш мақсадида ўз йўналишларини ўзгартирмоқда. Бундай компаниялар қаторига United Airlines (UAL.O), British Airways ва Virgin Atlantic киради. Аксарият рейслар ўз йўналишини Покистон ва Эрон ҳаво майдонига ўзгартирган.

Reuters таъкидлашича, авиакомпаниялар ва ҳукуматлар «ер-ҳаво» ракеталари билан боғлиқ иккита ҳалокатли ҳодисада — Донецк яқинида Малайзиянинг МH-17 самолётининг уриб туширилиши ва Теҳрон яқинида Украина халқаро ҳаво йўллари самолётининг қулатилишидан кейин зиддиятли зоналар устидан учиш хавфига кўпроқ эътибор қарата бошлаган.

Германиянинг Lufthansa авиаконцерни ва унга кирувчи барча компаниялар Афғонистон осмонидан ўтувчи парвозларни тўхтатди. Lufthansa Group таркибига Германиянинг Eurowings, Швейцариянинг Swiss, Австриянинг Austrian Airlines ва Брюсселнинг Brussels Airlines авиакомпаниялари киради.

Афғонистон фуқаро авиацияси бошқармаси (АCАА)нинг маълум қилишича, Кобул ҳаво майдони ҳарбийлар учун очиқ, транзит самолётларга уни айланиб ўтиш тавсия этилади.

АCАА, шунингдек, фуқаролик рейсларини тўхтатди ҳамда «талончилик ва тартибсизликларнинг олдини олиш учун« фуқаролардан Кобул аэропортига келмасликни сўради.

Кобул аэропортида тартибсизликлар бошланган. «Толибон» барча чегара пунктларини эгаллаб олган, Афғонистонни фақат самолёт орқали тарк этиш мумкин. Аэропорт одамларга тўлган. AFP хабарига кўра, оломон учиш-қўниш йўлагига бостириб кирган, натижада АҚШ ҳарбийлари ҳавога огоҳлантирувчи ўт очишни бошлаган.

АҚШ расмий вакилининг Reutersга изоҳ беришича, оломон назоратдан чиқиб кетгач, тартибсизликка қарши курашиш учун отишма бошланган.

«РИА Новости» нинг хавфсизлик хизматидаги манбасига кўра, Кобул аэропортида аллақачон бир неча киши ҳалок бўлган.

Эслатиб ўтамиз, 15 август куни «Толибон» Афғонистоннинг бутун ҳудудини ўз назорати остига олганини эълон қилди. Шу куни «Толибон» Кобулдаги президент саройига кирди. Кейинроқ ҳукумат кучлари тарк этган барча давлат муассасаларини ва давлат телевидениесини эгаллаб олди.

Афғонистон президенти Ашраф Ғани истеъфо беришга рози бўлган ва мамлакатни тарк этган. The New York Times ва Al Jazeera Ашраф Ғанининг Ўзбекистонга йўл олгани ҳақида хабар берди. Аммо кейинроқ Ашраф Ғани Ўзбекистонда ҳам, Тожикистонда ҳам, Қозоғистонда ҳам эмаслиги маълум қилинди.

«Афғонистонда уруш тугади», — дея эълон қилди «Толибон» ҳаракати расмий вакили Муҳаммад Наим Al-Jazeera телеканали эфирида.