Афғонистонда уруш тугади, дея маълум қилди «Толибон» ҳаракати расмий вакили Муҳаммад Наим Al-Jazeera телеканали эфирида.
«Биз Афғонистоннинг барча арбоблари билан мулоқот олиб боришга тайёрмиз ва уларга зарур ҳимоя тақдим этилишини кафолатлаймиз», — дея қўшиб қўйди Наим.
Унинг сўзларига кўра, «Толибон» ўзининг ҳар битта қадамини масъулият билан босади ва барча томонлар билан тинч муносабатларни сақлаб қолишни хоҳлайди.
«Биз ўзимиз интилган нарсага — мамлакат озодлигига ва халқимиз мустақиллигига эришдик», — қўшимча қилди «Толибон» вакили. Унинг сўзларига кўра, гуруҳ Афғонистон ҳудудидан бошқа мамлакатларга ҳужум қилиш учун фойдаланилишига йўл қўймайди ва бошқа мамлакатлар ички ишларига аралашмайди. Шунингдек, Наим халқаро масалаларни музокаралар орқали ҳал қилишга тайёрлигини билдирди.
Twitter’да «Толибон» вакили ишонтиришича, Афғонистон пойтахтининг гуруҳ назорати остига ўтиши чет эл фуқаролари ва дипломатик миссиялари учун хавф туғдирмайди.
«Кобулдагиларнинг барчаси бизга ишониши мумкин, Ислом Амирлиги (‘Толибон’ ўз давлатини шундай атайди) кучларига эса Кобулда ва мамлакатнинг бошқа шаҳарларида хавфсизликни таъминлаш топширилган», — дейилади хабарда.
Шунингдек, «Толибон» ҳокимиятни Афғонистоннинг амалдаги президенти Ашраф Ғанидан қабул қилиб олишдан бош тортгани хабар берилмоқда.
«РИА Новости» ва «Известия» президент саройидаги манбаларига таяниб маълум қилишича, низо томонлари ҳокимиятнинг «Толибон»га бошқа етакчилар, шу жумладан, мамлакат собиқ президенти Ҳамид Карзай ва Афғонистонда миллий ярашув бўйича олий кенгаш раҳбари Абдулла Абдулла қўлидан тинч йўл билан топширилиши бўйича турли вариантлар кўриб чиқилмоқда.
Ашраф Ғанининг ўзи мамлакатни 15 август куни тарк этди.
Британиянинг The Times газетаси «Толибон»нинг юқори мартабали етакчиларига таяниб ёзишича, жангарилар мамлакатда мутлақ ҳокимиятга даъвогарлик қилмоқда.
«Толибон» расмий вакили Суҳайл Шоҳин Афғонистондаги янги ҳукумат таркибига ҳаракат аъзоси бўлмаган афғонистонликлар ҳам киришини маълум қилди.
«Афғонистон инклюзив ислом ҳукумати ҳақида гапирганимизда бу унда бошқа афғонистонликлар ҳам иштирок этишини англатади», — деди у. Шоҳин аниқ исмларни айтишга ҳали эрта экани, аммо ҳукуматга «анча таниқли арбоблар» жалб қилинишини айтди.
Ҳаракат вакили сўзларига кўра, қуролларини тушириб, «Толибон»га қўшиладиган ҳарбий хизматчилар ва полициячиларнинг барчаси афв этилади, уларнинг ҳаёти ва мол-мулки хавфдан холи бўлади.
Унинг қўшимча қилишича, уларнинг исмлари тегишли рўйхатга киритилади ва улардан захира кучлари сифатида фойдаланилиб, заруратга қараб сафарбар қилинади.
АҚШ президенти Жо Байден Афғонистондан Америка қўшинлари олиб чиқиб кетилишини эълон қилганидан кейин «Толибон» бутун мамлакат ҳудуди бўйлаб ҳужум бошлади. Америка қўшинлари мамлакатга 2001 йилда киритлган эди.
15 август куни жангарилар Афғонистоннинг бутун ҳудудини ўз назорати остига олганини эълон қилди. Шу куни «Толибон» Кобулдаги президент саройига кирди. Кейинроқ ҳукумат кучлари тарк этган барча давлат муассасаларини ва давлат телевидениесини эгаллаб олди. «Толибон» телевидение орқали чиқиш қилиб, фуқароларни хотиржамлик сақлашга чақирди.
Изоҳ (0)