Бирлашган Миллатлар Ташкилоти (БМТ) Хавфсизлик Кенгаши 16 август куни эрталаб Афғонистон масаласида йиғилиш ўтказади. Бу ҳақда «РБК» хабар берди.
Одатда Хавфсизлик Кенгашининг эрталабки мажлислари соат 10:00 да (Тошкент вақти билан 19:00) ўтказилади. БМТ Бош котиби Антониу Гутерриш Афғонистондаги вазият ҳақида ҳисобот беради.
Аввалроқ БМТ «Толибон» фурсатдан фойдаланиб, Афғонистонга ҳужум қилишни тўхтатиши кераклигини айтганди. Акс ҳолда, мамлакат халқаро майдонда яккаланиб қолиши мумкин.
«Ҳужумларни тўхтатиш вақти келди. Жиддий музокаралар бошлаш вақти бўлди. Ҳозир узоқ давом этадиган фуқаролар урушидан ёки Афғонистоннинг яккалаб қўйилишидан сақланишнинг айни вақти », — деди Гутерриш.
Шунингдек, Антониу Гутерриш Афғонистонда инсон ҳуқуқларининг бузилишига барҳам бериш лозимлигини айтди.
БМТ веб-сайтидаги маълумотларга кўра, ташкилот Афғонистоннинг жанговар ҳаракатлардан энг кўп зарар кўрган туманларида «инсон ҳуқуқлари жиддий бузилаётгани» ҳақида хабарлар олмоқда.
«Бош котиб, айниқса, аёллар ва қизларнинг келажаги ҳақида қайғурмоқда, уларнинг ҳуқуқлари ҳимояланган бўлиши керак», — дейилади хабарда.
Бош котиб, шунингдек, фуқаролар ҳаётини ҳимоя қилиш ва гуманитар муаммоларни ҳал қилиш мақсадида «Толибон» ташкилотини ва бошқа сиёсий кучларни ўзини тийишга чақирди. Зиддиятнинг барча томонлари гуманитар ташкилотларнинг мамлакатга тўсиқсиз киришини таъминлаши керак, дея қўшимча қилди Гутерриш.
Шу билан бирга, аввалроқ «Толибон»нинг ўзи аёлларнинг ўқиши ва ишлашига, журналистларнинг эса мамлакатда бўлаётган воқеаларни танқид қилишига рухсат беришни ваъда қилган.
15 август куни «Толибон» Афғонистоннинг бутун ҳудудини ўз назорати остига олганини эълон қилди. Шу куни «Толибон» Кобулдаги президент саройига кирди. Кейинроқ ҳукумат кучлари тарк этган барча давлат муассасаларини ва давлат телевидениесини эгаллаб олди. «Толибон» телевидение орқали чиқиш қилиб, фуқароларни хотиржамлик сақлашга чақирди.
«Афғонистонда уруш тугади», — дея эълон қилди «Толибон» ҳаракати расмий вакили Муҳаммад Наим Al-Jazeera телеканали эфирида.
Мавзуга доир:
Изоҳ (0)