Тошкент вилояти Оҳангарон туманида жойлашган корхона очиқ майдонида ёнғин келиб чиқди, дея хабар бермоқда Фавқулодда вазиятлар вазирлиги.
Маълум қилинишича, 24 июль куни соат 12:28 да Тошкент вилояти Фавқулодда вазиятлар бошқармасига Оҳангарон тумани «Марказий қўрғон» МФЙ ҳудудидаги «Биоэкоҳимоя» хусусий корхонасига қарашли очиқ майдонда ёнғин бўлаётгани ҳақида хабар келиб тушди.
Ёнғинни бартараф этишга 4 та ёнғин-қутқарув бўлинмаси, 32 нафар ҳарбий хизматчи ҳамда кўнгилли фуқаролар жалб этилди. Биринчи бўлинма чақирилган манзилга соат 12:40 да етиб бориб, ёнғин 16:30 да қуршаб олинди ва соат 17:20 да тўлиқ бартараф этилди.
Ҳодиса оқибатида тан жароҳати олган ва ҳалок бўлганлар йўқ. Ёнғин даврида очиқ майдонда қуруқ ўт ва шох-шабба ёнган. Ёнғиннинг тахминий сабаби очиқ оловдан фойдаланишдаги эҳтиётсизлик деб ҳисобланмоқда.
Ҳозирда кўрилган моддий зарар миқдори аниқланмоқда.
Бундан аввал Қамчиқ довонида эҳтиётсизлиги оқибатида пастликка тушиб кетган Nexia йўловчиси қутқарилгани, Юнусободдаги иккита хонадонда ёнғин содир бўлгани ҳамда Тошкентда электрон реклама экрани ёниб кетгани ҳақида хабар берилганди.
Изоҳ (0)