Toshkent viloyati Ohangaron tumanida joylashgan korxona ochiq maydonida yong‘in kelib chiqdi, deya xabar bermoqda Favqulodda vaziyatlar vazirligi.
Ma’lum qilinishicha, 24-iyul kuni soat 12:28 da Toshkent viloyati Favqulodda vaziyatlar boshqarmasiga Ohangaron tumani “Markaziy qo‘rg‘on” MFY hududidagi “Bioekohimoya” xususiy korxonasiga qarashli ochiq maydonda yong‘in bo‘layotgani haqida xabar kelib tushdi.
Yong‘inni bartaraf etishga 4 ta yong‘in-qutqaruv bo‘linmasi, 32 nafar harbiy xizmatchi hamda ko‘ngilli fuqarolar jalb etildi. Birinchi bo‘linma chaqirilgan manzilga soat 12:40 da yetib borib, yong‘in 16:30 da qurshab olindi va soat 17:20 da to‘liq bartaraf etildi.
Hodisa oqibatida tan jarohati olgan va halok bo‘lganlar yo‘q. Yong‘in davrida ochiq maydonda quruq o‘t va shox-shabba yongan. Yong‘inning taxminiy sababi ochiq olovdan foydalanishdagi ehtiyotsizlik deb hisoblanmoqda.
Hozirda ko‘rilgan moddiy zarar miqdori aniqlanmoqda.
Bundan avval Qamchiq dovonida ehtiyotsizligi oqibatida pastlikka tushib ketgan Nexia yo‘lovchisi qutqarilgani, Yunusoboddagi ikkita xonadonda yong‘in sodir bo‘lgani hamda Toshkentda elektron reklama ekrani yonib ketgani haqida xabar berilgandi.
Izoh (0)