«Афросиёб» поездининг янги таркиби Тошкентга етиб келди (видео)

Испаниянинг Бильбао шаҳридан жўнатилган «Афросиёб» поезди Тошкентга етиб келди, дея хабар бермоқда «Ўзбекистон темир йўллари» матбуот хизмати.

Қайд этилишича, 2021 йил июль ойи бошида Испаниянинг «Patentes Talgo S.L.U.» компанияси томонидан ишлаб чиқарилган «Афросиёб»нинг янги поезди Испаниянинг Бильбао шаҳридан Тошкентга жўнатилганди.

Дастлаб янги поезд махсус юк кемада 4000 километр масофани босиб ўтиб, Россиянинг Санкт-Петербург шаҳрига етказилди. У ерда ҳаракат таркибининг барча вагон ва локомотивлари йиғилиб, яхлит ҳолатга келтирилганидан сўнг, 20 июль куни темир йўл орқали Ўзбекистонга жўнатилди.

Россия ва Қозоғистон ҳудудларидан яна 4200 километр масофани босиб ўтиб, ниҳоят 24 июль куни кечки пайт Тошкентга етказилди.

Эслатиб ўтамиз, ушбу русумдаги поезд Ўзбекистонда бешинчиси ҳисобланмоқда. 2021 йил якунига қадар яна битта шу турдаги юқори тезликда ҳаракатланувчи поезд келтирилади. Ҳозирги вақтда Ўзбекистон ривожланган юқори тезликдаги темир йўл инфратузилмасига эга бўлган 20 та дунё мамлакати рўйхатидан ўрин олган бўлиб, дунёнинг юқори тезликдаги поездлари рейтинги (Global High-Speed Train Ranking)га киритилган Марказий Осиёнинг ягона мамлакати ҳисобланади.

Таъкидланишича, келтирилган янги поезднинг расмий тақдимот маросими шу кунларда, карантин чекловларининг барча меъёр ва қоидаларини инобатга олган ҳолда амалга оширилади.