Трамп АҚШ президенти сайловида қатнашиш масаласида бир қарорга келди

АҚШ собиқ президенти Дональд Трамп навбатдаги президентлик сайловларида қатнашиш ёки қатнашмаслик тўғрисида бир қарорга келганини айтди. Бу ҳақда сиёсатчининг Fox News телеканалига берган интервьюсига таяниб «РБК» хабар берди.

«Мен жавобни биламан, аммо уни ҳозирча ошкор қила олмайман, чунки бу кампанияни молиялаштиришга ва бошқа нарсаларга таъсир қилиши мумкин. Лекин менда аниқ жавоб бор», — деди Трамп навбатдаги президентлик пойгасида қатнашиш нияти бор-йўқлиги ҳақидаги саволга жавобан.

АҚШда сўнгги президентлик сайловлари 2020 йилнинг 3 ноябрь куни бўлиб ўтганди. Сайловчиларнинг фаол иштироки ва почта орқали юборилган овозлар сони кўп бўлгани сабабли натижалар кечроқ эълон қилинган. Охир-оқибат Трамп рақиби — демократ Жо Байденга ютқазгани маълум бўлди. Трамп 232 овоз, Байден эса 302 овозни қўлга киритганди.

Трамп сайловлар сохталаштирилган деб ҳисоблайди, унинг жамоаси бир неча бор натижаларни суд орқали бекор қилишга уриниб кўрган, аммо бу иш бермаган. Баъзи штатлар бюллетенларни қайта санаб чиқди, аммо бу натижаларга таъсир қилмади.

Февраль ойида Трамп 2024 йилги президентлик сайловларида яна қатнашиш нияти ҳақида гапиришга ҳали эрта эканини таъкидлади, аммо унинг сўзларига кўра, Трамп АҚШ аҳолиси томонидан кенг қўллаб-қувватланмоқда. «Рақамлар жуда яхши, жуда юқори. Ўйлайманки, улар сайловлар чоғидаги кўрсаткичлардан ҳам юқорироқ, ўзи ўшанда ҳам юқори эди», — деди у.

Март ойида сиёсатчи 2024 йилда яна давлат раҳбари лавозимига номзодини қўйиши мумкинлигини айтди ва тарафдорлари ундан «умидвор»лигини қўшимча қилди. Апрель ойида собиқ президент навбатдаги сайловларда қатнашиш ғоясига жиддий муносабатда эканини билдирди. «Сизга шуни айтишим мумкин: мен буни жуда жиддий қабул қиламан. Жиддийдан ҳам ортиқ. Аммо юридик нуқтаи назардан, бу маълумотни тарқатиб юбормоқчи эмасман, бунга ҳали эрта», — деган Трамп.