Июнь охирида интернетда оригинал дизайнга эга футуристик кўринишдаги замонавий «Запорожец»нинг тасвирлари пайдо бўлди. Унинг муаллифи мустақил дизайнер Александр Шторм ҳисобланади, деб хабар беради CARakoom.
Шторм iReactor лойиҳаси билан бирга машҳур модель борасидаги тасаввурларини тақдим этган — у ҳозирги кунда сёрферлар учун идеал автомобилга айланиши мумкин эди.
Шторм ўз ижод намунасини «писта махлуқ» деб атаган. Ўзига хос рангдаги замонавий «ЗАЗ» ихчам шаклга ва ортиқча қирралар ҳамда штамповкаларсиз тоза кўринишга эга.
Автомобилнинг олд қисми қолипли радиатор панжараси, оригинал бампери ва квадрат шаклидаги замонавий ёруғлик оптикаси ҳисобига ноодатий кўриниш олган. Орқа қисмида эса дизайнер эски «Запорожец»ларнинг таниқли фонарларини сақлаб қолган. Бу каби уйғунлик анча қизиқ ва истиқболли кўриниш касб этади.
Функционаллиги жиҳатидан рендерлар муаллифи машинани турли шикаст ва тирналишлардан ҳимояловчи пластикдан ишланган қора «обвес», шунингдек, том қисмига сёрфинг тахталарини қотиришга мўлжалланган жой билан жиҳозлаган. Унга олтитагача сёрф ёки саккизта CUP-борд жойлаштириш мумкин. Хромланган юкхонасида эса эшкаклар учун бўлма мавжуд.
Дизайнернинг сўзларига кўра, митти «ЗАЗ» салонига тўрт киши сиғади. Бу каби автомобиль ҳаётга татбиқ этилса, унга 1,3 литрли двигатель ўрнатилади ва у 100 километр масофага беш литр ёнилғи сарфлайди.
Шу сабабли янги «Запорожец» нафақат сув спорти билан шуғулланувчилар, балки тежамкорликни яхши кўрувчилар учун ҳам алмаштириб бўлмас автомобилга айланган бўлар эди. Александр Штормнинг тахминича, бу каби модель нархи 800 минг рубль (10 минг доллар) атрофида бўлади.
Аввалроқ Украинанинг Днепр шаҳрида истиқомат қилувчи автомобиль ишқибозлари «Запорожец»дан ўз қўллари билан ҳақиқий пойга спорткарини йиғгани тўғрисида хабар берилганди.
Изоҳ (0)