Iyun oxirida internetda original dizaynga ega futuristik ko‘rinishdagi zamonaviy “Zaporojets”ning tasvirlari paydo bo‘ldi. Uning muallifi mustaqil dizayner Aleksandr Shtorm hisoblanadi, deb xabar beradi CARakoom.
Shtorm iReactor loyihasi bilan birga mashhur model borasidagi tasavvurlarini taqdim etgan — u hozirgi kunda syorferlar uchun ideal avtomobilga aylanishi mumkin edi.
Shtorm o‘z ijod namunasini “pista maxluq” deb atagan. O‘ziga xos rangdagi zamonaviy “ZAZ” ixcham shaklga va ortiqcha qirralar hamda shtampovkalarsiz toza ko‘rinishga ega.
Avtomobilning old qismi qolipli radiator panjarasi, original bamperi va kvadrat shaklidagi zamonaviy yorug‘lik optikasi hisobiga noodatiy ko‘rinish olgan. Orqa qismida esa dizayner eski “Zaporojets”larning taniqli fonarlarini saqlab qolgan. Bu kabi uyg‘unlik ancha qiziq va istiqbolli ko‘rinish kasb etadi.
Funksionalligi jihatidan renderlar muallifi mashinani turli shikast va tirnalishlardan himoyalovchi plastikdan ishlangan qora “obves”, shuningdek, tom qismiga syorfing taxtalarini qotirishga mo‘ljallangan joy bilan jihozlagan. Unga oltitagacha syorf yoki sakkizta SUP-bord joylashtirish mumkin. Xromlangan yukxonasida esa eshkaklar uchun bo‘lma mavjud.
Dizaynerning so‘zlariga ko‘ra, mitti “ZAZ” saloniga to‘rt kishi sig‘adi. Bu kabi avtomobil hayotga tatbiq etilsa, unga 1,3 litrli dvigatel o‘rnatiladi va u 100 kilometr masofaga besh litr yonilg‘i sarflaydi.
Shu sababli yangi “Zaporojets” nafaqat suv sporti bilan shug‘ullanuvchilar, balki tejamkorlikni yaxshi ko‘ruvchilar uchun ham almashtirib bo‘lmas avtomobilga aylangan bo‘lar edi. Aleksandr Shtormning taxminicha, bu kabi model narxi 800 ming rubl (10 ming dollar) atrofida bo‘ladi.
Avvalroq Ukrainaning Dnepr shahrida istiqomat qiluvchi avtomobil ishqibozlari “Zaporojets”dan o‘z qo‘llari bilan haqiqiy poyga sportkarini yig‘gani to‘g‘risida xabar berilgandi.
Izoh (0)