«Avto.ru» сайти орқали идеал ҳолатда сақланган 1998 йилги оқ «ВАЗ-2105» автомобили сотувга қўйилди. Ҳозирга қадар 10 километр йўл босган модель 3 миллион рублга (40 минг доллар) баҳоланмоқда, бу пулга Россияда янги Toyota Land Cruiser Prado харид қилиш мумкин, деб хабар беради Motor.
Сотувга қўйилган «ВАЗ-2105» экспорт нусха ҳисобланади. Эълон қилинган суратларга кўра, автомобилнинг ташқи кўриниши ва техник жиҳати идеал ҳолатда. «Жигули»нинг заводдаги деярли барча пломбалари сақланиб қолган. Машинанинг қолган элементларига 23 йил давомида тегинилмаган.
Сотувчининг сўзларига кўра, «ВАЗ-2105» ҳеч қачон ҳисобда турмаган ва сотишдан олдинги тайёргарликдан ўтмаган. Шу муносабат билан автомобилда орқани кўришга мўлжалланган кўзгу, ойнадаги чўткалар ва магнитола йўқ. Модель салони тўлиқ қора рангда ишланган. Машина 71 от кучини тақдим этишга қодир 1,5 литрли карбюратор двигатель ёрдамида ҳаракатга келади. Агрегат механик узатмалар қутиси ёрдамида бошқарилади.
Сотувчи 10 километргина йўл босган коллексион «Жигули»ни 3 миллион рублга сотишни режалаштирмоқда — у автомобилни ҳатто Россиянинг исталган нуқтасига етказиб беришга тайёр.
Аввалроқ Россияда 27 йил гаражда сақланган «Жигули» янги Spark нархида сотувга қўйилгани, Петербургда 22 йил гаражда сақланган янги «ВАЗ-2104» топилгани, Москвада идеал ҳолатдаги Lada коллекцияси 210 минг долларга сотилаётгани, Россияда завод пломбалари олинмаган 26 йиллик «Жигули» янги BMW Х3 нархида сотувга қўйилгани тўғрисида хабар берилганди.
Мавзуга доир: Қозонда 46 км йўл босган 23 йиллик «Жигули» янги «Vesta» нархида сотувга қўйилди (фото)
Изоҳ (0)