Экология ва атроф-муҳитни муҳофаза қилиш соҳасидаги назорат бўйича инспекция ходимлари Тошкент вилояти Янгийўл тумани ҳудудида ноқонуний қум-шағал қазиб олинаётганини аниқлади. Бу ҳақда қўмита матбуот хизмати хабар берди.
Таъкидланишича, ҳолат юзасидан қонунчиликда белгиланган тартибда жарималар расмийлаштирилиб, қум-шағал қазишга жалб этилган техникалар вақтинча махсус жойга жойлаштирилган. Бироқ экоинспекторлар олдига Х. исмли шахс келиб, мазкур бизнес унга тегишли экани ҳамда шу ишни ими-жимида ёпишни сўраган. Бунинг учун у 4 минг доллар миқдорида пора таклиф қилган.
Давлат экология қўмитаси ходимлари бу таклифни кескин рад этган ва ҳуқуқни муҳофаза қилиш органларига мурожаат қилган. Х. эса уларга яна бошқа йўллар билан таъсир ўтказишга ҳаракат қилишга уринган. Натижада ушбу фуқаро экология ва атроф-муҳитни муҳофаза қилиш соҳасидаги назорат инспекторига пора беришга уринаётганда Давлат хавфсизлик хизмати ва прокуратура ходимлари томонидан воқеа жойида қўлга олинган.
Ҳозирда ушбу ҳолат юзасидан тегишли идоралар томонидан дастлабки суриштирув ишлари олиб борилмоқда.
Аввалроқ Фарғонада ЙПХ инспекторига 2 миллион сўм пора берган ҳайдовчи қўлга олингани, Андижонда жиянига чиқарилган суд ҳукмини ёпиб юбориш эвазига ИИБ ходимига 500 доллар бермоқчи бўлган шахс ушлангани тўғрисида хабар берилганди.
Изоҳ (0)