Toshkent viloyatida 1000 dollar porani olmagan kadastr xodimi 10 million so‘m pul va sihatgohga 2 kishilik yo‘llanma bilan rag‘batlantirildi. Bu haqda Davlat soliq qo‘mitasi huzuridagi Kadastr agentligi xabar berdi.
Ma’lum qilinishicha, 17-fevral kuni Kadastr agentligi Zangiota tuman bo‘limi boshlig‘i vazifasini bajaruvchi Azamat Adilovga yengil tipdagi issiqxona tashkil etish uchun ajratilgan yer maydonining topografik syomkasini tasdiqlab berish evaziga 1000 AQSH dollari miqdorida pora taklif qilingan.
Bo‘lim boshlig‘i pora taklif qilayotgan fuqaro to‘g‘risida Zangiota tuman Iqtisodiy jinoyatlarga qarshi kurashish departamentiga xabar bergan va fuqaroning noqonuniy xatti-harakatlari fosh etilgan.
“Bugun yuqoridagi tashabbuskor xodim Kadastr agentligining Toshkent viloyatidagi barcha rahbar va xodimlar ishtirokida 10 million so‘m pul mukofoti hamda Xonobod sihatgohiga 2 kishilik yo‘llanma bilan rag‘batlantirildi. Ushbu holat yurtimizda korrupsiyaga qarshi olib borilayotgan kurashning kichik bir namunasidir”, — deyiladi xabarda.
Eslatib o‘tamiz, 2020-yilda Qashqadaryoda 1000 dollar pora olmagan IIB xodimiga 15 million so‘m pul mukofoti berilgandi.
Izoh (0)