Коронавирусга қарши курашиш штаби аъзоси Нурмат Отабеков қайси вакцина билан эмланганини айтиб ўтди.
Нурмат Отабеков «Ўзбекистонда ишлатилаётган вакциналарнинг қайси бирини тавсия қилган бўлардингиз?» деган саволга қуйидагича жавоб берди:
«Мен у ёки бу вакцинани тавсия қилиш эҳтимолидан йироқман. Негаки, Ўзбекистонда ишлатилаётган ўзбек—хитой, ‘Спутник V’ ва AstraZeneca вакцинаси буларнинг ҳаммаси сифатли вакцина. Шу нуқтайи назардан вакциналарни танлаш ихтиёри ўзингизда.
Ўзим шахсан ўзбек—хитой вакцинаси билан 3 маротаба эмландим. Текширувлар шуни кўрсатдики, менда етарли миқдорда иммунитет шаклланган», — дейди Нурмат Отабеков.
Аввалроқ Нурмат Отабеков исталган вакцина билан жон деб эмланишини маълум қилганди.
Эслатиб ўтамиз, Республика махсус комиссиясининг қарори билан коронавирус инфекциясига қарши эмлаш тадбирларида аҳоли фаоллигини ошириш мақсадида 50 ёш ва ундан катта ёшдаги фуқароларни ҳамда олий таълим муассасалари профессор-ўқитувчиларини хавфости гуруҳига мансуб аҳоли қатлами қаторида босқичма-босқич давлат бюджети маблағлари ҳисобидан эмлаш белгиланганди. Тошкентда 28 июндан 18 ёшдан катта бўлган барча қатлам коронавирус инфекциясига қарши давлат бюджети маблағлари ҳисобидан ихтиёрий тарзда оммавий эмланади, вакцина олган талабаларга контракт тўлашда чегирма берилади.