«Қурилиш ишларида 899 миллион сўм талон-торож қилинган». Сўнгги пайтларда муаммолар кўп кузатилаётган Тошкент метрополитени фаолияти ўрганилди
Республика Транспорт прокуратураси сўнгги пайтларда муаммолар кўп кузатилаётган Тошкент метрополитенида ўрганиш ишларини олиб борди. Бу ҳақда «Ўзбекистон 24» телеканали орқали маълум қилинди.
Ўтказилган таҳлил натижаларига кўра, соҳада кўплаб қонунбузилиш ҳолатлари содир этилгани аниқланган. Хусусан, 2021 йилнинг май—июнь ойларида Тошкент метрополитени УКда ўтказилган ўрганишлар натижасида жами 650 та инсон омили билан боғлиқ камчилик топилган.
Шунингдек, Тошкент ҳалқа йўли ерости метрополитенида олиб борилган қурилиш ишларида 899 миллион сўм талон-торож қилинган ва ушбу ҳолатлар юзасидан жиноий иш қўзғатилган.
Қайд этиш жоизки, март ойидан буён Тошкент метрополитени билан боғлиқ шу каби воқеалар тез-тез юз бермоқда. Хусусан, 18 март куни «Олмазор» (Чилонзор йўли) ва «Бекат-1» (Сергели йўли) орасидаги туннелда икки поезд тўқнашганди.
9 апрель куни ижтимоий тармоқларда поезднинг очиқ эшиклар билан ҳаракати туширилган видео тарқалди. Шу билан бирга, метрополитендаги ерости ва ерусти поезд ҳаракатларининг бир нечта бошқа видеолари ҳам ижтимоий тармоқларда кўп бора муҳокама қилинди. 28 апрель куни эса туннелда тўхтаб қолган поезд ҳақидаги видео тарқалди, унда йўловчилар рельслар орқали ҳаракатланиб, бекатга етиб олгани тасвирланган. 13 май куни «Амир Темур хиёбони» бекатида барча йўловчилар тушириб юборилганди. 27 июнь куни «Чилонзор» метро бекатида вагон эшиклари очилмай қолди.
Мавзуга доир: «Ҳозир видеога олиш ҳам ‘талант’ бўлиб қолди» — Тошкент метрополитени раҳбари метрода кузатилаётган турли ҳолатлар ҳақида
