Toshkent metropolitenining “Chilonzor” yo‘lidan “Sergeli” yo‘liga o‘tish joyida poyezdlar to‘qnashib ketdi, deya xabar qilmoqda Favqulodda vaziyatlar vazirligi.

Foto: Favqulodda vaziyatlar vazirligi

Ma’lum qilinishicha, 18-mart kuni, taxminan, soat 20:10 larda Toshkent shahar Chilonzor tumanidagi “Olmazor” yerosti metro bekatidan “Sergeli” metro yo‘nalishining “Choshtepa” yerusti metro bekati tomon harakatlanib ketayotgan 4 ta vagondan iborat yo‘nalish tarkib (sostav) texnik sabablarga ko‘ra to‘xtab qolgan.

Oqibatda ushbu yo‘nalishda harakatlanib kelayotgan navbatdagi yo‘nalish tarkib(sostav) to‘xtab turgan vagonga borib, yengil urilgan. Ma’lum bo‘lishicha, hodisada jabrlangan va halok bo‘lganlar yo‘q. Vagonlarga ham katta zarar yetmagan.

Shuningdek, “Sergeli” metro yo‘nalishining voqea sodir bo‘lgan qismida harakat vaqtincha to‘xtatilganligi bois qolgan tarkib (sostav)larning harakati qo‘shimcha (yordamchi) yo‘nalish bo‘yicha davom ettirilgan.

Hozirda ushbu yo‘nalishda harakatlar to‘liq qayta yo‘lga qo‘yilgan.

Mazkur holat yuzasidan Toshkent shahar FVB, IIB hamda metropoliten xodimlari tomonidan vagon ichidagi yo‘lovchi fuqarolar xavfsiz joyga evakuatsiya qilingan.

Bundan tashqari voqea joyiga Toshkent shahar FVB rahbariyati, yong‘in-qutqaruv xizmati, tuman IIB, prokuratura hamda Milliy gvardiya xodimlari kelgan.

Hozirda vaziyat yuzasidan huquqni muhofaza qiluvchi organlar tomonidan tergovga qadar surishtiruv ishlari olib borilmoqda.

Bundan avval Toshkent yerusti halqa metrosining “Do‘stlik-2” bekati yaqinida hosil bo‘lgan darcha to‘g‘risida ma’lumot berilgani hamda Toshkentda 38 yoshli ayol o‘zini metro relsiga tashlagani haqida xabar berilgandi.