Соғлиқни сақлаш вазирлиги 4 июль ҳолатига кўра, Ўзбекистонда коронавирус инфекцияси қайд этилганларга оид статистикаси билан бўлишди. Маълум қилинишича, ўтган бир сутка ичида мамлакатда яна 475 кишида коронавирус тасдиқланган ва 304 киши касалликдан соғайган. Соғайганлар орасида COVID-19 инфекцияси энг кўп қайд этилаётган Тошкент шаҳри аҳолиси йўқ.
ССВ статистикасига кўра, Тошкент шаҳрида 1 июль куни 80 киши, 30 июнь куни 367 киши, 29 июнь куни 365 киши, 28 июнь куни 352 киши коронавирусдан тузалган. Аммо вазирлик кетма-кет уч кундан буён пойтахтда COVID-19 инфекциясидан тузалган беморларга оид маълумотларни эълон қилмаяпти.
Аввалроқ Зангиотадаги касалхона беморлар билан тўлгани, 2 минг кишига мўлжалланган жойда 2,5 мингдан ортиқ бемор даволанаётгани тўғрисида хабар берилганди. Шунингдек, Тошкент шаҳрида ДХХ тасарруфидаги «Ёшлик» ҳамда ИИВ тасарруфидаги «Универсал» спорт мажмуаларида ковид-марказ қайтадан ташкил этилган.
Мамлакатда кунлик касалланиш ҳолатлари сони яна ортиб бормоқда. Шу сабабли республика бўйлаб 28 июндан карантин чекловлари кучайтирилди. Тошкент шаҳрига 28 июндан транспорт воситалари киришига ҳамда кўнгилочар ва овқатланиш объектлари фаолиятига чекловлар ўрнатилди.
Изоҳ (0)