Исроил парламенти Ицхак Герцогни мамлакатнинг янги президенти этиб сайлади. Бу ҳақда «РБК» хабар берди.
Ицхак Герцог яҳудийларнинг «Сохнут» агентлиги раҳбари, парламент мухолифатининг собиқ етакчиси бўлган.
Jerusalem Post нашрининг ёзишича, у Исроилнинг қонун чиқарувчи органи — Кнессетда яширин овоз бериш йўли орқали сайланган. Герцогнинг номзодини 87 нафар депутат қўллаб-қувватлаган. У берилган овозлар натижасига кўра, Исроилнинг биринчи аёл президенти бўлиши мумкин бўлган Мирьям Перецни ортда қолдиришга муваффақ бўлди.
Натижалар эълон қилингандан сўнг Герцог депутатларга қўллаб-қувватлови учун миннатдорлик билдирди ва барча исроилликларнинг президенти бўлишга ваъда берди.
Ицхак Герцог Хаим Герцогнинг ўғли. Хаим Герцог Исроил махсус хизматларининг яратилишига ҳисса қўшиб, мамлакатнинг БМТдаги доимий вакили лавозимида ишлаган. У 1983—1993 йилларда Исроил президенти бўлган. Ицхак Герцогнинг бобоси, Россия империясида туғилган Ицхак Айзик Герцог 1937—1959 йилларда Исроилнинг бош раввини бўлган.
Исроил — парламентар республика, президент, асосан, вакиллик функцияларини бажаради. Унинг вазифа ва ваколатлари қаторига хориждаги элчиларни тайинлаш ҳам киради. Шунингдек, президент парламент депутатлари орасидан ҳукумат раҳбари лавозимига номзодни танлаш ҳуқуқига эга. Исроилга Ицхак Герцогдан аввал Реувен Ривлин президентлик қилган.
Янги президент бошчилигидаги «Сохнут» ташкилоти яҳудийларни ватанига қайтариш ва уларнинг Исроилга жойлашишига кўмаклашиш билан шуғулланади. Таъкидланишича, сўнгги икки йил мобайнида Герцог мигрантлар билан кўп маротаба учрашган ва уларнинг шарафига нутқ сўзлаган, шу туфайли матбуотда у учун «ажойиб инсон» образи яратилган.
Аммо ўтган ҳафтада Герцогнинг танишларидан бир Илан Ешуа ўз интервьюсида бу образнинг ҳаққонийлигига путур етказди. Унинг сўзларига кўра, бўлажак президент шахсий ёзишмаларда «Авода» партиясидаги ҳамкасби ҳақида нохолис гапирган. Кейинчалик Герцог ушбу танишининг хатти-ҳаракатларини «номақбул» деб атади.
Изоҳ (0)