Коронавирусининг бошқаларидан кўра тезроқ тарқаладиган тўрт тури Жаҳон соғлиқни сақлаш ташкилотини (ЖССТ) жиддий ташвишга қўймоқда. Бу ҳақда ЖССТнинг Фавқулодда касалликлар бўлими раҳбари Мария ван Керкхове брифингда айтиб ўтди. деб ёзади «РБК».
Ван Керкхове қайд этишича, улардан бири коронавируснинг Вьетнамда топилган мутацияси. «ЖССТ мутахассисларига яхши маълум бўлган ушбу штаммнинг одамлар орасида тарқалиши анча осон», — дея қўшимча қилган мутахассис. У қолган учта штамм ҳақида ҳеч нарса демаган.
Мутахассиснинг таъкидлашича, ЖССТ коронавируснинг доимий ўзгариб туришига олдиндан тайёр бўлган. Келажакда COVID-19 эволюцияси давом этиши мумкин.
«Умуман олганда, бизни жиддий ташвишга соладиган тўртта штамм мавжуд. Бироқ инфекция тарқалишининг олдини олиш бўйича кўрилаётган чора-тадбирлар ушбу штаммларга қарши ҳам яхши самара бермоқда», — деган ван Керхов. У барча мамлакатларни ҳушёрликка чақирган ва уларга «эпидемиологик назорат» учун миннатдорлик билдирган.
Май ойининг охирида Вьетнам ҳукумати мамлакатда COVID-19’нинг янги штамми аниқлангани ҳақида хабар қилганди. Ушбу штамм инфекциянинг аввал маълум бўлган икки тури — «британча» ва «ҳиндча» штаммларнинг хусусиятларини ўз ичига олган.
Вьетнам соғлиқни сақлаш вазири Нгуен Тхан Лонгнинг айтишича, бир нечта беморларнинг таҳлилларини генетик секвенлаш уларда бир вақтнинг ўзида коронавируснинг иккита кенг тарқалган вариантлари мавжудлигини кўрсатган. Унинг сўзларига кўра, инфекциянинг янги тури анча юқумли ва ҳаво орқали осон тарқалади.
Соғлиқни сақлаш вазирлиги раҳбарининг сўзларига кўра, Вьетнам ҳукумати тез орада коронавируснинг янги штамми геномига оид маълумотларни нашр этади.
Буюк Британия штамми 2020 йил охирида пайдо бўлган. Мутахассислар «британча» штамм билан касалланган беморларда касалликнинг оғир босқичларигача бормаслиги, бироқ касалликнинг бошқаларга юқиш эҳтимоли юқори эканини билдирган.
Ҳиндистон штамми эса мамлакатда апрелдан буён COVID-19 инқирозини вужудга келтирган, касаллик асоратлари оқибатида вафот этганлар сони ҳам кескин ошган.
Изоҳ (0)