ЖССТ Хитойнинг коронавирусга қарши Sinovac вакцинасини маъқуллади. Бу ташкилот томонидан маъқулланган еттинчи вакцинадир

Жаҳон соғлиқни сақлаш ташкилоти (ЖССТ) Хитойнинг Sinovac Biotech компанияси ишлаб чиқарган коронавирусга қарши вакцинани 18 ёшдан катталарга  фавқулодда фойдаланиш учун маъқуллади. Бу ҳақда ЖССТ раҳбари Тедрос Гебрейесус брифингда маълум қилди, деб ёзади «РБК».

«Хавфсиз, самарали ва кафолатланган сифатларга эга, деб топилган Sinovac CoronaVac вакцинасининг ЖССТ Фавқулодда реестрига қўшилганини мамнуният билан эълон қиламан», — деди Гебрейесус.

Унинг таъкидлашича, Sinovac’ни оддий шароитда сақлаш мумкинлиги уни ресурслари чекланган мамлакатларга мослаштиради. «Ушбу қутқарув воситасини ёрдамга муҳтож одамларга тезроқ етказиб бериш ҳозир ниҳоятда зарур», — деди ЖССТ директори.

Sinovac — ЖССТ томонидан тасдиқланган иккинчи Хитой вакцинаси. Май ойининг бошида ЖССТ илк бор Sinopharm препаратини фавқулодда ҳолатларда фойдаланишга рухсат берди. Ташкилот илгари Pfizer / BionTech, Moderna, Johnson & Johnson компанияларининг вакциналарини, шунингдек, Оксфорд университети ва Жанубий Корея ҳамкорликда ишлаб чиқарилган AstraZeneca компаниясининг иккита вакцинасини рўйхатга олган.

Россиянинг «Спутник V» вакцинаси ЖССТ мутахассислари томонидан ҳали кўриб чиқилмоқда. Ташкилот вакцинани июнь ёки июль ойларида тасдиқлаши мумкинлигини айтган.