Туркманистонда шу кунга қадар COVID-19’га чалиниш ҳолати аниқланмаган. Бу ҳақда мамлакат президенти Гурбангули Бердимуҳамедов «Мир» телерадиокомпаниясига берган интервьюсида айтиб ўтди, деб ёзади «Интерфакс».
«COVID-19 таҳдиди пайдо бўлган биринчи кунлардан бошлаб биз коронавирусга қарши курашнинг ташкилий, ҳуқуқий, молиявий, иқтисодий, санитария-эпидемиология, тиббий ва карантин тадбирлари мажмуини назарда тутадиган ягона миллий стратегияни шакллантириб тайёрладик», — деган президент телебошловчининг «Сиз қандай қилиб Туркманистон халқини бу балолардан қутқара олдингиз?» деган саволига жавобан.
Президентнинг таъкидлашича, ушбу ишларнинг барчасига раҳбарлик қилиш учун хавфли юқумли касалликларга қарши курашиш бўйича ҳукумат комиссияси тузилган. Унинг таркибига ҳукумат аъзолари, вазирликлар, идоралар, ижро этувчи ҳокимиятнинг маҳаллий органлари раҳбарлари киритилган.
Бердимуҳамедовнинг сўзларига кўра, «мамлакат COVID-19 пайдо бўлганидан бери кўрилган биринчи чора-тадбирлар қаторида чегара, миграция ва божхона режимларини босқичма-босқич кучайтиришни жорий қилган. Шу билан бирга, Туркманистон билан хорижий давлатлар ўртасидаги ҳаво алоқасида объектив равишда вазият талаб қилган чекловлар киритилган».
Президент ҳозирги кунда мамлакат аҳолиси 14 турдаги юқумли касалликларга қарши эмланаётганини айтган.
«Туркманистон Россиянинг ‘Спутник-V’, ‘ЭпиВакКорона’ вакциналарини рўйхатдан ўтказган биринчи ўнталик мамлакатлар қаторига киради. Ушбу вакциналар ҳозирги кунда хавф гуруҳидаги одамларнинг эҳтиёжлари учун муваффақиятли тарзда қабул қилинмоқда», — деган Бердимуҳамедов.
Унинг таъкидлашича, юқумли касалликларнинг олдини олиш бўйича ишлар билан бирга «янги карантин марказлари барпо этилмоқда, ўткир юқумли касаллик белгилари бор шахсларни сақлаш учун айрим тиббиёт муассасалари қайта профилланиб, зарур дори воситалари ва тегишли тиббий асбоб-ускуналар сотиб олинмоқда».
«Шу билан бирга, мамлакатимиз аҳолиси умумий тиббий кўрикдан ўтказилиб, одамларнинг иммунитет даражасини яхшилаш бўйича самарали чоралар кўрилмоқда», — деган Туркманистон раҳбари.
Туркманистоннинг расмий идоралари COVID-19’га чалиниш ҳолатлари мавжудлигини тасдиқламаган бўлса-да, коронавирус тарқалишининг олдини олиш мақсадида мамлакатда ниқоб тақиш режим амал қилмоқда, хорижий рейслар тўхтатилган.
Аввалроқ ЖССТ мамлакатда пневмония билан касалланиш кўпайганидан хавотирда эканини билдирган ва ҳукуматга коронавирус аллақачон бутун мамлакат бўйлаб тарқалганидагидек зарур чораларни кўришни тавсия қилган.
Изоҳ (0)