Эрон “Толибон” ҳаракатидан Буюк Британия билан ҳамкорлик қилган афғонлар рўйхатини улашишни сўради. Бу рўйхат Қўшма Қироллик Мудофаа вазирлигидаги ахборот сизиб чиқиши натижасида қўлга киритилган. Бу ҳақда Тhе Daily Telegraph газетаси ўз манбаларига асосланиб маълум қилди.
Маълум бўлишича, тасодифий ахборот сиқиб чиқиши натижасида 2021 йил августида толиблар ҳокимиятга келишидан олдин Лондон билан яқиндан ҳамкорлик қилган 25 мингга яқин афғоннинг шахсий маълумотлари ошкор бўлган. Буюк Британия ҳукумати 2022 йилда юз берган бу воқеа ҳақида фақат 2023 йил августда хабар топган ва Афғонистонда қолаётган бу одамларни қиролликка устувор тарзда кўчириш дастурини ишга туширган. Бундан ташқари, 100 дан ортиқ британиялик, жумладан, МI6 ташқи разведка хизмати ва махсус кучлар ходимларининг шахсий маълумотлари ҳам ошкор бўлган.
Маълумотларнинг сиқиб чиқишига Буюк Британия Мудофаа вазирлиги ходимининг махфий маълумотлар ёзилган хатни хато равишда четдаги электрон почтага юбориши сабаб бўлган.
Хабарга кўра, Теҳрон мазкур рўйхатдан ўз атом дастури бўйича музокараларда “айирбошлаш воситаси” сифатида фойдаланмоқчи. Таъкидланишича, ҳужжатда Бирлашган Қиролликдан бошпана сўраб мурожаат қилган афғонлар, жумладан, Британия армиясида хизмат қилган ҳарбийлар ва махсус хизматлар ахборотчиларининг исмлари келтирилган. Уларнинг баъзилари кейинчалик Эронга қочиб кетган.
Таъкидланишича, ушбу рўйхатдаги камида бир киши аллақачон Эрондан Афғонистонга чиқариб юборилган, бу эса икки давлатнинг ушбу масала бўйича ҳамкорлиги бошлангани далолатидир.
“Август ойи охирида Эронга қарши Европа санкциялари қайта тикланишидан олдин бундай одамларни иложи борича кўпроқ топиб, улардан яширин музокара воситаси сифатида фойдаланиш керак”, деди нашрга Эроннинг юқори мартабали амалдорларидан бири.
Бугунги кунга қадар 4,5 мингга яқин афғон маълумотлар сиқиб чиққанидан сўнг хавфсизлик мақсадида Буюк Британияга олиб кетилган. Кейинчалик уларнинг сони 7 мингтага етиши тахмин қилинмоқда. Умуман олганда, халқаро қўшинлар Афғонистондан олиб чиқилганидан бери 30 мингдан ортиқ афғон қиролликка кўчиб ўтган.
25 июль Эрон, Франция, Германия ва Буюк Британия Истанбулда ядровий музокаралар ўтказди. Ушбу Европа давлатлари сўнгги кунларда Теҳронга қарши халқаро санкциялар қайта жорий этилишидан огоҳлантириб келаётганди.
Изоҳ (0)