Ироқда «қора замбуруғ» авж олди, Канадада бир нечта COVID-вакциналарни бирга қўллаш мумкин бўлди, Британияда пандемия бошидан буён биринчи марта ўлим қайд этилмади. Коронахабарлар
Жонс Ҳопкинс университети маълумотларига қараганда, дунё бўйича 171 188 807 киши COVID-19’ни юқтириб олган, шуларнинг 3 565 284 нафари вафот этган. Касалланиш ҳолатларининг кўплиги бўйича АҚШ (33,2 миллион), Ҳиндистон (28,3 миллион), Бразилия (16,6 миллион), Франция (5,7 миллион) ва Туркия (5,2 миллион) энг олдинда бормоқда.
Ироқда «қора замбуруғ» авж олди
Ироқ жанубида камида икки киши «қора замбуруғ» номи билан кўпроқ маълум бўлган мукормикоз замбуруғ касаллигидан вафот этди.Мамлакат соғлиқни сақлаш департаменти вакили маълум қилишича, «қора замбуруғ» авж олиб кетгунича, Ироқнинг Ди-Кар туманида иккита ўлим ҳолати қайд этилган эди.
Улар коронавирус инфекцияси оқибатидаги асоратлар билан боғлиқдир. Тиббиёт ходимлари берган маълумотларга кўра, 51 ёшли беморнинг кўзида қора замбуруғ пайдо бўлганидан кейин унга шундай ташхис қўйилган. Ушбу аҳоли пункти ҳудудида мукормикоз билан касалланиш бўйича жами тўртта ҳолат аниқланган.
Ироқ соғлиқни сақлаш департаменти директори Абдул Амир ал-Халфий аниқлик киритишича, «қора замбуруғ»ни тупроқ ва қишлоқ ҳудудининг ифлосланиши оқибатида юқтириб олиш мумкин.
Мавзуга доир: Мисрда 7 кишида қора замбуруғ аниқланди. Ҳиндистонда сариқ замбуруғга чалинган илк бемор вафот этди
Канадада COVID-19’га қарши бир нечта вакциналарни биргаликда қўллашга рухсат берилди
Канада Иммунизация бўйича миллий консултатив қўмитаси коронавирусга қарши вакциналарни аралаштириб қўллашни маъқуллади. Бунда гап AstraZeneca, Moderna ва Pfizer компаниялари вакциналари ҳақида бормоқда.Хусусан, дастлаб AstraZeneca билан эмланганлар иккинчи дозани олишда шу препаратдан ташқари, Moderna ёки Pfizer’дан бирини ҳам танлаши мумкин. Агар биринчи доза сифатида Moderna ёки Pfizer’дан фойдаланилган бўлса, иккинчиси ҳам фақат шу икки компания вакциналари бўлиши керак, чунки иккала вакцина ҳам мРНК технологиясига асосланган.
Ушбу тавсиялар Испания ва Буюк Британияда олиб борилган янги тадқиқотларга асосланган. Уларнинг натижаларига кўра, AstraZeneca ва Pfizer вакциналарини аралаштириш COVID-19 олдини олиш учун хавфсиз ва самарали бўлиб чиққан.
Британияда 2020 йил мартидан буён биринчи марта коронавирусдан ўлим қайд этилмади
Буюк Британияда 1 июнь ҳолатига ўтган бир кеча-кундузда коронавирус оқибатида бирорта ҳам ўлим қайд этилмади. Бирлашган Қироллик Соғлиқни сақлаш вазирлиги маълумотларига кўра, сўнгги марта 2020 йил мартида, пандемиянинг энг бошида ўлим қайд этилмаган эди.Мамлакатда COVID-19 оқибатидаги жами ўлимлар сони 127 мингтага тенг. Вирусдан вафот этганлар сони 19 январь куни ўз чўққисига чиққан — ўша куни 1,3 минг киши вирус қурбонига айланган.
Шунингдек:- Япония эҳтиёжманд мамлакатларга COVID-19’га қарши вакцинация учун 800 миллион доллар ажратади. Мамлакат бош вазири Ёсихиде Суга онлайн саммит чоғида COVAX халқаро дастурини ривожлантириш учун 800 миллион долларгача маблағ ажратишга ваъда берди.
- Жаҳон соғлиқни сақлаш ташкилоти, Жаҳон савдо ташкилоти ва Халқаро валюта жамғармаси COVID-19’га қарши вакциналар адолатли тарзда тақсимланишини ёқлаб чиқди. ЖССТ бош директори Тедрос Гебрейесус иштирокида ёзилган очиқ хатда жаҳон ҳамжамияти вакциналарни адолатли тақсимлаш ва коронавирус пандемиясига нуқта қўйишни таъминлаш бўйича мажбуриятни ўз зиммасига олиши кераклиги айтилади.
