Швейцариянинг Женева шаҳрида 16 июнь куни бўлиб ўтадиган Россия—Америка саммити пайтида шаҳар устидаги ҳаво майдони фуқаролик самолётлари учун ёпилиши мумкин. Бу ҳақда Швейцария мудофаа, фуқаро муҳофазаси ва спорт федерал департаментининг расмий вакили Мирей Флери «РБК»га маълум қилди.
«Мумкин бўлган чора-тадбирлар орасида ҳаво майдонини кузатиб бориш, қирувчи самолётларни ва қуруқликдаги ҳаво мудофаасини жойлаштириш ва агар керак бўлса, фуқаролик авиацияси учун ҳаво майдонидан фойдаланишни чеклаш ҳам бор», — деди у.
Флерининг сўзларига кўра, Женева устидаги ҳаво майдонини кузатишга тайёргарлик кўрилмоқда, аммо келишувларнинг моҳияти тўғрисида батафсилроқ маълумот беришнинг иложи йўқ.
Россия ташқи ишлар вазири Сергей Лавров Путин ва Байденнинг учрашувидан катта ютуқ кутмасликка чақирди.
«Биз иллюзия яратмаймиз ва қандайдир ютуқлар бўлади, тарихий қарорлар қабул қилинади, деган тасаввур ҳосил қилишга уринмаймиз. Аммо икки етакчи ядровий давлатларнинг юқори лавозимли расмийлар даражасидаги суҳбат, албатта, муҳим, уни ҳар томонлама қўллаб-қувватлаш лозим» — деди вазир.
Унинг сўзларига кўра, Женевадаги учрашувда Путин ва Байден ўз мамлакатларига нисбатан глобал ва маҳаллий таҳдидлар тўғрисида фикр алмашиши кутилмоқда.
Ўз навбатида Оқ уй Байден ва Путиннинг бўлажак учрашуви биринчи навбатда АҚШ манфаатларини ҳимоя қилиш учун зарурлигини маълум қилди.
«Биз буни Америка манфаатларини ҳимоя қилишнинг муҳим қисми деб биламиз. Шу сабабли мамлакатларимиз ўртасидаги зиддиятларга қарамаай, аксинча, шу зиддиятлар туфайли президент Байден Владимир Путин билан учрашмоқда», — деди Оқ уй вакили Карен Жан-Пьер.
Унинг сўзларига кўра, Вашингтон ва Москва кўплаб масалаларни ҳал қилиши керак. Байден Америка позициясини АҚШнинг бошқа расмийларига қараганда яхшироқ етказади.
«Жавобни тўғридан-тўғри президент Путиндан эшитиш — бу Россиянинг режалари ва ниятларини тушунишнинг энг самарали усули. Айниқса қийин муносабатларда раҳбарларнинг ўзаро мулоқоти ўрнини ҳеч нарса боса олмайди», — деди Оқ уй вакили.
Унинг таъкидлашича, раҳбарлар ўртасидаги юзма-юз суҳбат икки мамлакат позицияларини яққол тушуниш, мавжуд қарама-қаршиликларни юмшатиш ва алоқа нуқталарини топиш имконини беради.
13 апрель куни АҚШ президенти Жо Байден россиялик ҳамкасби билан учинчи давлат ҳудудида учрашиш истаги борлигини айтган эди. Кремль саммитнинг Евроиттифоқ давлатларидан бирида бўлиб ўтиши мумкинлигини маълум қилди. 4 май куни Байден учрашувнинг июнь ойида бўлиб ўтишини «умид билан кутаётгани»ни айтди. Кейинчалик Кремль раҳбарларнинг учрашуви 16 июнь куни Швейцариянинг Женева шаҳрида бўлиб ўтишини тасдиқлади.
Аввалроқ Байден Путин билан учрашувда унга нималар дейишини маълум қилган эди.
Изоҳ (0)