Isroil parlamenti Isxak Gersogni mamlakatning yangi prezidenti etib sayladi. Bu haqda “RBK” xabar berdi.
Isxak Gersog yahudiylarning “Soxnut” agentligi rahbari, parlament muxolifatining sobiq yetakchisi bo‘lgan.
Jerusalem Post nashrining yozishicha, u Isroilning qonun chiqaruvchi organi — Knessetda yashirin ovoz berish yo‘li orqali saylangan. Gersogning nomzodini 87 nafar deputat qo‘llab-quvvatlagan. U berilgan ovozlar natijasiga ko‘ra, Isroilning birinchi ayol prezidenti bo‘lishi mumkin bo‘lgan Miryam Peresni ortda qoldirishga muvaffaq bo‘ldi.
Natijalar e’lon qilingandan so‘ng Gersog deputatlarga qo‘llab-quvvatlovi uchun minnatdorlik bildirdi va barcha isroilliklarning prezidenti bo‘lishga va’da berdi.
Isxak Gersog Xaim Gersogning o‘g‘li. Xaim Gersog Isroil maxsus xizmatlarining yaratilishiga hissa qo‘shib, mamlakatning BMTdagi doimiy vakili lavozimida ishlagan. U 1983—1993-yillarda Isroil prezidenti bo‘lgan. Isxak Gersogning bobosi, Rossiya imperiyasida tug‘ilgan Isxak Ayzik Gersog 1937—1959-yillarda Isroilning bosh ravvini bo‘lgan.
Isroil — parlamentar respublika, prezident, asosan, vakillik funksiyalarini bajaradi. Uning vazifa va vakolatlari qatoriga xorijdagi elchilarni tayinlash ham kiradi. Shuningdek, prezident parlament deputatlari orasidan hukumat rahbari lavozimiga nomzodni tanlash huquqiga ega. Isroilga Isxak Gersogdan avval Reuven Rivlin prezidentlik qilgan.
Yangi prezident boshchiligidagi “Soxnut” tashkiloti yahudiylarni vataniga qaytarish va ularning Isroilga joylashishiga ko‘maklashish bilan shug‘ullanadi. Ta’kidlanishicha, so‘nggi ikki yil mobaynida Gersog migrantlar bilan ko‘p marotaba uchrashgan va ularning sharafiga nutq so‘zlagan, shu tufayli matbuotda u uchun “ajoyib inson” obrazi yaratilgan.
Ammo o‘tgan haftada Gersogning tanishlaridan bir Ilan Yeshua o‘z intervyusida bu obrazning haqqoniyligiga putur yetkazdi. Uning so‘zlariga ko‘ra, bo‘lajak prezident shaxsiy yozishmalarda “Avoda” partiyasidagi hamkasbi haqida noxolis gapirgan. Keyinchalik Gersog ushbu tanishining xatti-harakatlarini “nomaqbul” deb atadi.
Izoh (0)